Ekeliziasiti 1:2-13

²“Loke laena! Loke laena!” gua si rau, sa tie va tumatumae. “Namu loke laena hokara! Doduru ginugua si loke laedi.”

³Na sa si vagia sa tie koari doduru nana minabo sapu ṉataṉata nia sa pa kauruna sa rimata?

⁴Na sinage si mae meke taloa, ba sa kasia popoa si asa nana eko mo.

⁵Sa rimata si gasa sage meke lodu gore pule, meke bebeno pule la vasina kote gasa pule si asa.

⁶Sa givusu si mae gua pa kali gevasa, meke taliri mae gua pa kali togarauru; viloro meke vilorae si asa, meke pule mae gua mo vasina mae guana tatasana.

⁷Doduru tototolo si gore beto la pa kolo hokara, ba sa lamana si lopu boka siṉi. Pa vasina mae guadi sari na tototolo si vasina tugo pule la sa kolo.

⁸Doduru ginugua si na loke vina betodi, variva mabodi, lopu boka zama ni na tie. Sa mata si doṉo lamo ba lopu boka deṉa, meke sa taliṉa si lopu boka beto avavoso.

⁹Sapu ele ta evaṉa si kote ta evaṉa pule, sapu ele ta tavete si kote ta tavete pule tugo; namu loketoṉa si vaqura pa kauruna sa rimata.

¹⁰Koa nana beka keke toṉa sapu boka zama guni nia keke tie, “Dotu! Hie keke toṉa si vaqura”? Lokari, na pukerane hola tu ele koa nana; ele koa nana tu sipu lopu ele podo si gita.

¹¹Loke tie si kote balabala i saripu ele mate, meke arini pu lopu ele podo si lopu kote balabala i arini pu korapa mumudi mae koa rini.

¹²Arau sa tie va tumatumae, si koa pa Zerusalema meke baṉara nia sa binaṉara Izireli.

¹³Voriti nia rau telequ pude vilitia meke hata ia pa ginilagilana sari doduru ginugua pu ta tavete pa kauruna sa maṉauru. Hinokara mamatana sa pinaleke sapu vala nia Tamasa koari na tie!