Dehet deng Aan in Nutus sas 15:14-19

¹⁴Kaka Petrus halas-sam nahdeh hidi kit noan, Ama Lamtua Allah nikit atuli-atuil man Yahudi lo kas, le halin oen tamas daid Lamtua Yesus atulin son.

¹⁵Na tom nol asa man Ama Lamtua mee-baha las in tek meman son, deng lolo hmunan nua ka. Ta oen dul noan:

¹⁶‘Tom nol un oras sa lam, Auk pait maang. Undeng Auk le bangun pait laih Daud in prenta ka. Ta Auk le tao un in hua-koet man sisakes hidi son nas, le daid kuat pait.

¹⁷Nini ela, atuli-atuil deng bangsa didang ngas kon, maas nuting le tutnaal nol Au. Undeng Auk huil nal oen kon son, le daid Auk atulin. Ama Lamtua Allah esa tek ela son, deng lolo hmunan nua!’

¹⁹Tiata muid auk in nangan nam, elia: eta atuil deng bangsa didang le maas muid Ama Lamtua Allah lam, kit atuil Yahudi li tao sus oen deken. Kit tao ngele oen le tadus daek muid kit hadat sunat ta deken. Tiata, kit musti dul surat mesa, le tunang beles noan, oen tao muid kit atorang hadat Yahudi li totoang deken tia. Kit kon musti hidas noan, oen boel len-langan nol atuli-bihaat man oen sapan lo ka deken. Kaa siis in hui-langus deken. Kaa hmukit tas dalan deken. Nol oen kon kaa hmukit man atuli kes tele ka, sisin nas deken.