Buk Song 71:1-17

¹Bikpela, mi save stap wantaim yu, na ol birua i no inap bagarapim mi. Yu no ken larim ol i winim mi.

²Yu stretpela olgeta, olsem na yu ken helpim mi na kisim bek mi long han bilong ol birua. Yu ken harim prea bilong mi na kisim bek mi.

³Yu stap olsem strongpela banis, na olsem strongpela haus. Bai mi go insait na yu lukautim mi, long wanem, mi ken i go long yu tasol na mi hait. Yu tasol inap lukautim mi na mi stap gut.

⁴God bilong mi, kisim bek mi long han bilong ol man nogut. Ol i strong tumas na pasin bilong ol i nogut tru.

⁵Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau.

⁶Oltaim mi stap long han bilong yu tasol na mi wokabaut. Mama i karim mi na yu bin lukautim mi i kam inap long nau. Olsem na bai mi litimapim nem bilong yu oltaim.

⁷Planti manmeri i bin lukim mi na ol samting i kamap long mi, na ol i save, yu tasol yu strong tumas long lukautim mi.

⁸Long olgeta de mi save litimapim nem bilong yu na tokaut long biknem bilong yu long ol manmeri.

⁹Nau mi lapun pinis na mi no gat strong moa, orait nogut yu lusim mi na givim baksait long mi.

¹⁰Ol birua i laik kilim mi, na ol i kibung na pasim tok long bagarapim mi.

¹¹Ol i tok olsem, “Goan, yumi ranim em na holimpas em. I no gat wanpela man i stap bilong helpim em. God i lusim em pinis.”

¹²Orait God, yu no ken i stap longwe long mi. God bilong mi, yu mas i kam hariap na helpim mi.

¹³Dispela ol man i sutim tok long mi, yu ken daunim ol na pinisim ol tru. Ol i laik bagarapim mi, olsem na yu mas paulim ol na mekim ol i sem nogut tru.

¹⁴Tasol bai mi bilip long yu oltaim na mi wet long yu i helpim mi. Bai mi litimapim nem bilong yu moa yet.

¹⁵Bai mi tokim ol manmeri long stretpela pasin yu bin mekim. Mi no save gut long as bilong olgeta samting yu bin mekim, tasol maski, long olgeta de bai mi tokim ol long yu bin kisim bek mi.

¹⁶God, Bikpela, bai mi tingim bikpela strong bilong yu na bai mi litimapim nem bilong yu. Bai mi autim tok olsem, “Bikpela tasol em i stretpela.”

¹⁷God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim.