Buk Song 6:4-9

⁴Bikpela, yu kam. Kisim bek mi. Yu man bilong marimari oltaim, yu ken helpim mi na bai mi no inap i dai.

⁵Ol man i dai pinis, ol i no save tingim yu. Long ples ol i stap long en, ol i no save givim biknem long yu.

⁶Mi singaut singaut na strong bilong mi i pinis olgeta. Olgeta nait aiwara bilong mi i save wasim bet bilong mi. Mi krai moa yet na hetpilo bilong mi i wara olgeta.

⁷Mi gat planti birua, olsem na mi krai krai i stap. Ai bilong mi i solap. Mi no inap lukim wanpela samting.

⁸Yupela ol man i mekim pasin nogut, yupela klia long mi. Bikpela i harim pinis krai bilong mi.

⁹Mi bin singaut long Bikpela i helpim mi, na em i harim mi pinis. Em i harim prea bilong mi.