Buk Song 55:15-23

¹⁵Ol birua bilong mi, pasin nogut i pulap tru long bel bilong ol na long haus bilong ol. Orait mi laik bai ol i dai kwiktaim. Taim ol i stap laip yet, na ol i mas i go long ples bilong ol man i dai pinis.

¹⁶Tasol mi prea long God i helpim mi. Na bai em yet i kisim bek mi.

¹⁷Long moningtaim na long biksan na long nait tu mi save krai long em long ol hevi i bagarapim mi. Na bai em i harim prea bilong mi.

¹⁸Planti man i save pait long mi. Tasol mi no kisim bagarap, long wanem, God i lukautim mi na bringim mi i kam bek gen.

¹⁹Bipo tru God i stap king, na nau tu em i stap king. Bai em yet i harim prea bilong mi, na bai em i winim ol birua long pait. Ol i no save pret long em, olsem na ol i no inap mekim wanpela samting bilong helpim ol yet.

²⁰Dispela pren bilong mi em i pait long ol pren bilong em yet. Na em i brukim dispela promis em i bin mekim wantaim ol bipo.

²¹Long maus em i save mekim switpela tok, tasol long bel em i save stap birua bilong mi. Tok bilong en i mekim mipela i stap bel isi. Tasol dispela tok i sap tumas olsem bainat, na i katim mipela.

²²Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.

²³Tasol God, bai yu rausim ol man i save kilim ol man i dai, na ol man bilong giaman, na bai ol i go daun long ples nogut na bai ol i lus. Taim bilong ol i no pinis yet na bai ol i dai. Tasol mi yet, bai mi bilip strong long yu oltaim.