Kap 55:15-23

¹⁵Aŋpak yokwi da butnikon tugawit, do uwalno but pɨsoni mɨni tepmɨsi kɨmotni do nandɨsat. Kalugɨ sigɨn egek kɨmakbi kokupmon kɨnisi.

¹⁶Mani Piŋkop da aŋpulugosak do bɨsit asat, do iyɨ nak yokwikon naŋ abɨdosak.

¹⁷Jɨgɨ da nak aŋupbal aŋ, do wɨsa dagokdo, ae gɨldat binap, ae kalbi kɨsi kunam tak ɨbo bɨsitno nandɨsak.

¹⁸Amɨn morapmɨ da nɨkgaŋ, mani gɨptɨmno dɨma yokwi taŋ, nido Piŋkop da jɨgɨkon naŋ pulugaŋ nepmaŋek kɨlano aŋakwan tagɨsi egɨsat.

¹⁹Piŋkop toktok teban kɨla amɨn madep egɨsak. Uwalno Piŋkop do dɨma pasal ɨmaŋ, ae aŋpakni kulabɨk ak do dɨma nandaŋ, do Piŋkop bɨsitno nandaŋek uwal emaron pabɨŋ yopdɨsak.

²⁰Nak dakon notno iyɨ dakon notni gat emat aŋ. Aŋek kalɨp notni gat saŋbek saŋbek awit uŋun tuwɨldak.

²¹Gen kaga da gen galagɨ yosok, mani butnikon da emat ak do nandak nandak asak. Geni da aban but yawot ekwamaŋ, mani geni uŋun geni tepmɨsi, emat agak sɨba yombem da nin mandaŋ nimɨsak.

²²Jɨgɨ morap ɨmekdal, uŋun Yawe da kɨsiron yopbisi. Aŋaki uŋun da ɨmegek kɨlago aŋek gak aŋteban asak. Amɨn kɨlegɨ yɨpban arɨpmɨ dɨmasi mosak.

²³Mani Piŋkop, gak da amɨn dapba kɨmokgoŋ amɨn gat, ae top yoŋ amɨn gat wɨrɨrɨkbɨ kɨmakbi kokupgwan pɨgek pasɨl mudokdaŋ. Kɨmot bɨsapni taŋakwa yawi kalɨk da tepmɨ kɨmotdaŋ. Mani egɨp egɨpno gagon tosok yaŋsi nandaŋ gabeŋ.