Buk Song 50:2-9

²God i stap long Saion, dispela taun i nambawan tru na i naispela tumas, na lait bilong God i kamap ples klia.

³God bilong yumi em i kam nau. Na em i no i stap isi. Nogat tru. Paia bilong kukim ol samting i go paslain long em, na bikpela win na ren i raunim em.

⁴Em i singautim heven na graun i kam bilong lukim em i skelim gut pasin bilong ol manmeri bilong en.

⁵God i tok olsem, “Ol manmeri bilong mi, yupela i bin mekim kontrak wantaim mi, na yupela i ofaim abus bilong strongim dispela kontrak. Yupela kam bung wantaim mi.”

⁶Heven yet i save autim tok olsem, “God i stretpela tumas. Em yet i jas.”

⁷God i tok, “Yupela manmeri bilong mi, harim. Mi gat tok long yupela. Yupela ol Israel, mi laik kotim yupela. Mi tasol mi God tru, na mi God bilong yupela.

⁸Mi no krosim yupela long ol ofa yupela i mekim. Nogat. Oltaim mi save lukim yupela i kukim ol ofa olgeta long paia.

⁹Tasol mi no laik kisim bulmakau man o meme man long banis bilong yupela. Nogat.