Buk Song 41:1-11

¹Devit i raitim dispela song. Em i song bilong man i bosim musik. Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em.

²God bai i lukautim em na strongim laip bilong em. Bikpela bai i mekim em i stap gut long ples bilong em. Na bai Bikpela i no larim ol birua i bagarapim em.

³Taim dispela man i gat sik, Bikpela bai i lukautim em. Em bai i mekim orait sik bilong em, na mekim em i kamap strong gen.

⁴Tasol mi yet mi tok olsem, “Bikpela, mi bin mekim sin long yu. Tasol yu ken marimari long mi, na pinisim sik bilong mi.”

⁵Ol birua bilong mi ol i bel nogut long mi na ol i tok, “Mobeta em i dai kwik na yumi ken lus tingting long em.”

⁶Sampela man i kam lukim mi, na ol i save toktok nating long mi. Ol i laik harim tok long mi gat sik nogut. Na bihain ol i go ausait gen, na long olgeta hap ol i stori long dispela sik bilong mi.

⁷Olgeta man i no laikim mi tru ol i save tok hait long sik bilong mi. Ol i ting samting nogut tru i laik bagarapim mi.

⁸Ol i tok olsem, “Samting nogut i kisim em pinis. Em i no inap kirap gen. Bai em i dai.”

⁹Mi gat wanpela pren, em i poroman tru bilong mi, na em i save kaikai wantaim mi. Tasol em tu i litimapim lek bilong krungutim mi.

¹⁰Bikpela, yu ken marimari long mi na pinisim sik bilong mi, na bai mi inap bekim pasin bilong ol dispela man.

¹¹Sapos ol birua i no daunim mi, bai mi ken save yu laikim mi.