SALMOS 41:1-11

¹Paqui nopa masehuali catli motequipachohua pampa quinicnelía catli teicneltzitzi, pampa TOTECO quipalehuis quema hualas tlaohuijcayotl.

²TOTECO quimocuitlahuis para amo aqui quimictis. Huan TOTECO quitiochihuas tlamiyacapa ipan tlali Israel. Yaya amo quicajtehuas, niyon amo quicahuas ininmaco icualancaitacahua para ma quichihuilica catli quinequise.

³Quema huetztos ipan tlaijiyohuilistli, TOTECO quitlananas ipan itlapech huan quiijcuinilis nopa cocolistli.

⁴Na niquilhui TOTECO: “TOTECO, na nitlajtlacolchijtoc moca ta. Techtlasojtla huan techchicahua.”

⁵Nocualancaitacahua quinequij ma nechajsi catli fiero. Noca camanaltij huan quinequij ma nimiqui huan ayacmo aqui nechelnamiquis.

⁶Quema nechpaxalohuaj, mochihuaj quen nohuampoyohua, pero amo nelía catli quiijtohuaj. Quema itztoque nohuaya san quitlacaquilíaj tlaque onca para huelis quipatlase ica catli más fiero, huan teipa quisase huan teyolmelajtinemise tlen na.

⁷Quena, nocualancaitacahua mosentilíaj huan noca camanaltij. Tepohuilíaj para ayacmo onca pajtli para na huan nimantzi nimiquis.

⁸Quiijtohuaj: “Nopa cocolistli catli yaya quipixtoc nelfiero. Ayacmo motlananas tlen itlapech pampa nimantzi miquis.” Quej nopa quiijtohuaj tlen na.

⁹Nojquiya nechcajtejtoc catli eliyaya nonelhuampox. Yaya catli ipan nimotemachiyaya huan catli tlacuayaya nohuaya, ama nechtlahuelcajtoc.

¹⁰Pero ta TOTECO, techtlasojtla. Techtlanana tlen notlapech huan niquincuepilis quen nechchihuilijtoque.

¹¹Nijmati techicnelía pampa amo tiquincahuilijtoc nocualancaitacahua ma nechtlanica.