Buk Song 18:1-27

¹Devit, wokman bilong Bikpela, em i raitim dispela song. Em i song bilong man i bosim musik. Devit i singim dispela song long Bikpela long de Bikpela i kisim bek Devit long han bilong Sol na long han bilong olgeta arapela birua bilong en. Bikpela, yu save strongim mi na mi laikim yu tumas.

²Bikpela em i strongpela banis bilong mi. Em i olsem ston i haitim mi, na em i save kisim bek mi long han bilong ol birua. God bilong mi em i olsem bikpela ston mi save go long en na hait long ol birua. Bikpela i olsem hap plang bilong mi na em i haitim mi long ol birua. Em i gat strong bilong kisim bek mi na lukautim mi. Em i olsem strongpela banis bilong mi.

³Mi beten long Bikpela na em i helpim mi, na ol birua i no inap bagarapim mi. Yumi mas litimapim nem bilong Bikpela.

⁴Klostu dai i painim mi, olsem ol baklain i pasim mi strong, na olsem si i kirap bikpela na i laik karamapim mi.

⁵Klostu dai i holim mi na mi go long matmat olsem umben i holimpas mi na mi no inap long ranawe.

⁶Mi bel hevi nogut na mi singaut strong long Bikpela. Mi singaut long God bilong mi bai em i helpim mi. Em i stap long haus bilong en na em i harim singaut bilong mi. Na em i putim yau long beten bilong mi.

⁷Orait nau Bikpela i kros long ol birua bilong mi. Olsem na em i mekim graun i guria nogut tru, na ol maunten i seksek moa yet.

⁸Smok i kamap long nus bilong Bikpela. Na paia i kamap long maus bilong en na kukim planti samting. Na em i sutim ol hap paia i go nabaut.

⁹Em i opim skai na i kam daun. Na blakpela klaut i stap aninit long lek bilong en.

¹⁰I olsem wanpela ensel i karim em na i flai i kam. Na i olsem win i gat wing bilong pisin na i karim God i kam hariap tru.

¹¹Em i mekim tudak i kamap olsem haus sel em i hait i stap long en, na ol blakpela klaut bilong ren i karamapim em.

¹²Tasol em i mekim ol klaut i lait olgeta, na ol hap paia na ren ais i sut i kam ausait long ol dispela klaut.

¹³Bikpela i stap long heven na i bikmaus moa yet olsem klaut i pairap. God Antap Tru i autim tok bilong en, na ol hap paia na ren ais i sut i kam daun.

¹⁴Em i mekim lait bilong klaut i kamap olsem ol spia bilong en, na em i sutim ol birua na ol i ranawe nabaut.

¹⁵Bikpela, yu krosim ol birua na belhat bilong yu i olsem strongpela win i sakim ol. Na belhat bilong yu i mekim solwara i drai olgeta, na ol samting bilong strongim graun i kamap ples klia.

¹⁶Bikpela i stap antap na i putim han i kam daun na i kisim bek mi. Bikpela si i karamapim mi tasol em i pulim mi i kam antap.

¹⁷Ol birua bilong mi i strong tru na mi no inap winim ol. Tasol Bikpela i kisim bek mi long han bilong ol.

¹⁸Bipo taim nogut i painim mi na ol birua i kam pait long mi. Tasol Bikpela i bin was long mi.

¹⁹Em i bin helpim mi na mi stap gut. Em i laikim mi tumas, olsem na em i kisim bek mi.

²⁰Mi bihainim stretpela pasin, olsem na Bikpela i givim mi planti gutpela samting. Mi no mekim wanpela rong, olsem na God i mekim gut long mi.

²¹Mi bihainim gut lo bilong Bikpela. Mi no bin givim baksait long God bilong mi na mekim pasin nogut.

²²Mi bin tingting oltaim long ol lo bilong en, na mi no bin sakim gutpela tok bilong en.

²³Em i save, mi no gat wanpela asua. Mi bin was gut long wokabaut bilong mi, nogut mi mekim wanpela rong.

²⁴Olsem na Bikpela i tingim stretpela pasin bilong mi, na em i bekim gutpela pasin long mi, long wanem, mi stap klin long ai bilong em.

²⁵Bikpela, sapos man i no lusim yu, orait yu no save lusim em. Sapos man i mekim stretpela pasin na i no gat asua, orait yu save bekim stretpela pasin tasol long em.

²⁶Sapos wanpela man i bihainim klinpela pasin, orait yu save soim em klinpela pasin bilong yu. Tasol sapos man i bihainim pasin nogut, orait yu save bekim nogut long em.

²⁷Yu save kisim bek ol manmeri i daunim ol yet. Tasol yu save daunim ol manmeri i litimapim nem bilong ol yet.