Buk Song 145:2-17

²Olgeta de bai mi tenkyu long yu. Na oltaim oltaim bai mi litimapim nem bilong yu.

³Bikpela i gat biknem na yumi mas litimapim biknem bilong em moa yet. Em i antap tru na yumi no inap save olgeta long biknem bilong en. Tingting bilong yumi i sot.

⁴God, ol lain manmeri i stap nau bai ol i tokaut long ol arapela lain i kamap bihain long ol samting yu mekim na bai ol i litimapim nem bilong yu. Na bai ol i stori long ol bikpela wok yu bin mekim.

⁵Ol man bai i tok long strong bilong yu, na long yu bikpela king tru. Na mi yet bai mi tingting long ol gutpela gutpela wok bilong yu.

⁶Bai ol manmeri i stori long ol strongpela wok yu bin mekim, na bai mi tokaut long yu i gat biknem tru.

⁷Ol bai i stori long ol gutpela pasin bilong yu na ol bai i singim song long marimari bilong yu.

⁸Bikpela i save laikim yumi tumas na i save marimari long yumi. Em i no save kros kwiktaim na oltaim em i save sori long yumi.

⁹Em i save mekim gutpela pasin long olgeta manmeri na em i save marimari long olgeta samting em i bin wokim.

¹⁰Bikpela, olgeta samting yu bin wokim bai i litimapim nem bilong yu. Na ol manmeri bilong yu bai i tenkyu long yu.

¹¹Bai ol i tok long biknem bilong yu i stap long olgeta ples yu bosim, na bai ol i stori long bikpela strong bilong yu.

¹²Olsem na bai olgeta manmeri i ken save long ol bikpela wok yu bin mekim. Na ol i ken save olsem yu stap strongpela king, na nem bilong yu i bikpela tru.

¹³Yu bai i stap king na bosim olgeta lain manmeri oltaim oltaim. God i save bihainim ol promis bilong en. Em i no save lusim wanpela. Em i save mekim ol gutpela samting tasol bilong helpim yumi.

¹⁴Em i save helpim olgeta manmeri i gat hevi na em i save litimapim olgeta manmeri ol arapela man i daunim ol.

¹⁵Olgeta samting i gat laip i save lukluk i go long em na em i save givim kaikai long ol taim ol i hangre.

¹⁶Em i save givim kaikai samting long olgeta inap long ol i stap gut.

¹⁷God i save bihainim stretpela pasin na em i save marimari long yumi long olgeta samting em i mekim.