SAM 145:2-17

²Nata kwep apman gae akganimbakngawit. Siwan asinggan asinggan nata gatane umandae yatangenawit.

³Buyambam tapa umana akopsa ge ninda umana kopsa waakngae buyambam siknga yatangenatnim. Sike waapa enane siknga ge ninda umana kopsa waakngae kuupbam natdetnanga dua. Ninu natdetdetninu dapaknga.

⁴Anutu, sike aminu apman yuaingga yakapmak kaknga dongu masan aatninguninde sanga gata pasikuyakge yaniwan ita gatane umanda yatangenatning. Siwan puya buyambamu tasikuyakge wamu yatake kuning.

⁵Sike amindanu gatane kekekngaka akngaenu ayaning. Gata gae king kapa ngangun. Siwan ninanu gatane puya take aknga akngaekan natapasiwit.

⁶Siwan aminbamda puya kekeknga taknga aknga pasikuyakge yatake kuning. Sike natanu gatane umanda kopsa akngae yakapit.

⁷Ita gatane take akngakae yatake kuyuuk gatu musip kwikwik takngakae natake kap taning.

⁸Buyambam tapata ninde butaya natanimuke itakan musip kwikwik natanimunggak. Sike ita kaanga zaat dua yake ita butaya ninde asinggan natanimunggak.

⁹Ita take aknga aminbamde tasike musip kwikwiu sangabamu pasike pekutde nataak.

¹⁰Buyambam tapa, gata sangabamu pasike pekuyakga gatane umanda ayatangenatning. Siwawan gikane amindabamda ganimbaknganing.

¹¹Sike ita umanda kopsa akngae kepna kepna kayuwayaune yaning. Yake gatane kekekngaka buyambam takngae yatake kuning.

¹²Yatake kuwawa amin kuupbamda puya buyambam taknga tasikuyakge natapning. Siwan gatu gae kingu kekekngaapa yuak ngang kaya kuut natapning. Natake umandae natapan buyambam siknga siwik.

¹³Sike ga king kapa yuke aminu kuupbam kakuya asinggan asinggan pasiya. Gata aminbam asinggan asinggan kayuya. I takngatu dua teak. I sanga tasike tekut takngae musia siwik.

¹⁴Sike ita aminu meya pakaingu akgatayamuke gatu aminu kunduta yaipakepu peyaingu ita gatuna yapangenakgak.

¹⁵Anutu, sanga kayuk yuaingu kai gaekan tapan tomna ba nataaingu nanamna tapdukngane yamunggayak.

¹⁶Ita nanamu kuupbamde yami takekan yutningge.

¹⁷Anutu waapa noman takngakan tawake sangabamu tasinggak katangu ninde musip kwikwik natanimunggak.