Brabli Gudwan Song 8:1-14

¹If yu bina main braja, en main mami bin lukaftum langa yu, en imbin gibit im ronwan milk langa yu, en if ai bina faindim yu eniweya langa roud, ai bina kiskis yu en nobodi nomo bina tok enijing blanga yunmi na.

²Ai bina gajim yu en deigimwei yu langa main mami kemp, weya yunmi bina jidan mijamet. En ai bina gibit yu olkain switwan wain blanga meigim yu jidan gudbinji.

³Pudum yu lefthensaid bingga andanith langa main hed, en pudum yu raidensaid bingga langa mi, en jidan brabli gulijap langa mi.

⁴Wal yumob gel brom Jerusalem, yumob garra pramis mi brabli strongbalawei. Yumob garra pramis nomo blanga kadimat minbala wen minbala laigim gija detmatj.

⁵Hu dijan kaminap brom deset kantri weya dubala holdimbat miselp bingga? Det gel im sing. Andanith langa det epul tri aibin weikimap yu langa det pleis weya yubin bon.

⁶Yu nomo laigim eni gel, oni mi na. Yu nomo holdimbat enibodi langa yu bingga, oni mi. Yunmi laigim gija detmatj. Im brabli strongwan wulijim deth. Det strongbala filing yunmi garram blanga yunmi selp, im jis laik deth. Im kaan gibap. Im barnimap yunmi insaid laik det bigwan faiya. Nobodi kaan deigidawei det strongbala filing blanga yunmi.

⁷Woda kaan pudumat det faiya, en det fladwoda kaan neba deigidawei det strongbala filing brom yunmi. Bat if enibodi wandim yu, dei kaan neba baiyim yu garram ola gudbala ting dei garram. Yu kaan neba baiyim det strongbala filing.

⁸Melabat garram sista deya, bat im yangwan en im dubala milk stil lilwan. Wanim melabat garra du blanga im wen im pramis garra kaman en wandi merrit langa im?

⁹Melabat yangwan sista im stil fletwan laiga wol. Melabat garra lafta meigim im purdiwan laiga haiwan haus garram silba. En melabat yangwan sista im stil fletwan laiga dowa. Melabat garra lafta meigim im purdiwan jis laik det sidatri wud weya dei meigim purdiwan.

¹⁰Mi na det wol, en main dubala milk im bigwan laik dubala haiwan haus. Main olmen im sabi mi bigwan na, en im jidan gudwei langa mi.

¹¹Salaman bin abum bigbala fam garram loda greiptri langa det pleis Beilaman. Imbin kadimat det fam en gibit langa najalot. En ebri fama bin peiyim im 1,000 silba mani brom selimbat ola frut daga.

¹²Salaman gin kipum holot 1,000 silba mani, en ol detlot fama gin kipum 200 silba mani, bat ai garram main ronwan greiptri fam.

¹³Ai wandim irrim yu tok brom det gadin, main olgamen. Main frenmob iya, en dei weidabat blanga irrim yu toktok du.

¹⁴Kaman langa mi, main olmen. Ran kwikbala laik det diya. Kaman iya langa det hil kantri weya ola gudsmelwan medisin oldei gro. Binij na.