Womu Duro 8:1-14

¹À n dɑɑ sɑ̃ɑ nɛn sesu mɛro turosi, kon kɑ nun yinnɑ tɔɔwɔ, kpɑ n nun bɔkɑsi, ɡoo kun mɑɑ mɑn ɡɛmmɔ.

²Kon kɑ nun dɑ nɛn mɛron yɛnuɔ kpɑ ɑ mɑn bwisi kɛ̃. Kon nun tɑm nubu duroruɡim wɛ̃ mɛ nɑ kuɑ kɑ dɑ̃ɑ bii ni bɑ mɔ̀ ɡerenɑdi.

³Nɑ kĩ nɑ n nɛn wiru sɔndi win nɔm dwɑrɔ, kpɑ win nɔm ɡeu ɡu mɑn bɔkɑsi.

⁴Bɛɛ Yerusɑlɛmun wɔndiɑbɑ, nɑ bɛɛ sɔ̃ɔmɔ, i ku nɛn kĩnɑsi yɑmiɑ sɑɑ ye u ǹ kĩ u se.

⁵wɑrɑ u wee ɡbɑburun di u win kĩnɑsi ɡbɑlli. Kurɔ u nɛɛ, nɑ nun yɑmiɑ dɑ̃ɑ sɑɑrɔ wunɛn yɛnun bɔkuɔ, mi wunɛn mɛro u wunɛn ɡurɑ suɑ u nun mɑrɑ.

⁶A de nɛ turon ɡɑri yi n wɑ̃ɑ wunɛn ɡɔ̃ruɔ. A de ɑ n nɛ turo bɔkɑsi. Domi kĩru tɑ dɑm mɔwɑ nɡe ɡɔɔ. Nisinu nu mɑɑ sɑ̃ɑwɑ ɡɑ̃ɑ ɡɔbunu nɡe ɡɔribun wɑ̃ɑ yeru. Nin dɑm mu sɑ̃ɑwɑ nɡe dɔ̃ɔ yɑri. Yinni Gusunɔn min diyɑ yi wee.

⁷Nim wɔ̃kun nim kɑ mɛn kpɑ̃ɑru mu ǹ kpɛ̃ mu kĩrun dɔ̃ɔ ɡo. Mɛyɑ mɑɑ dɑɑnun nim yiburu tɑ ǹ kpɛ̃ tu kĩi te wukiri. Tɔnu wi u win dukiɑ kpuro wɛ̃ bu kɑ nùn kĩɑn sɔ̃, u ǹ kĩi te wɑsi. Yen kɔkɔrɔ, bɑ koo nùn ɡɛmwɑ.

⁸sɑ sesu piibu mɔ wi u kun ɡinɑ bwɑ̃ɑ kpiɑ. Amɔnɑ sɑ ko nùn kuɑ sɑnɑm mɛ bɑ nùn kĩɑn nɑ.

⁹Ù n sɑ̃ɑ nɡe ɡbɑ̃rɑru, sɑ ko tu tɑ̃sisiɑwɑ kɑ sii ɡeesu. Ù n mɑɑ sɑ̃ɑ nɡe kɔnnɔ, sɑ ko ɡe kɔrewɑ kɑ dɑ̃ɑ ye bɑ mɔ̀ sɛdurun ɡɑmbo.

¹⁰nɑ sɑ̃ɑwɑ nɡe ɡbɑ̃rɑru, mɑ nɛn bwɑ̃ɑ yɑ sɑ̃ɑ nɡe wuu kɔ̃sobun wɑ̃ɑ yeru. Nɛn kĩnɑsi u yɛ̃ mɑ nɑ bɔri yɛndu mɔ win mi.

¹¹Sɑlomɔɔ u resɛm tɔ̃kɑn ɡbɑɑru mɔ Bɑɑli Hɑmɔɔwɔ. Mɑ u ɡbɑɑ te kɔ̃sobu nɔmu sɔndiɑ. Ben bɑɑwure u rɑ kɑ sii ɡeesun ɡobi nɔrɔbu (1.000) nɛwɑ bu sere ɡbɑɑ ten mɑrum sɔri.

¹²Sɑlomɔɔ u win sii ɡeesun ɡobi nɔrɔbu (1.000) suo u n mɔ, kpɑ u win ɡbɑɑ kɔ̃sobu yen ɡoobu (200) wɛ̃. Nɛnɑ nɑ nɛn tiin resɛm ɡbɑɑru mɔ, mɑ nɑ tu kɔ̃su.

¹³A de n wunɛn nɔɔ nɔ nɛn kĩnɑsi, wunɛ wi ɑ rɑ n wɑ̃ɑ dɑ̃ɑ ɡbɑɑru sɔɔ. Kpɑɑsibɑ kĩ bu ɡu nɔ.

¹⁴ɑ wɑsi suo nɛn kĩnɑsi, kpɑ ɑ n sɑ̃ɑ nɡe yɑɑ kpiku ǹ kun mɛ nɡe ɡini kpɛmɑ ye yɑ wɑ̃ɑ ɡuuru wɔllɔ mi yɑkɑ nubu duroruɡisu wɑ̃ɑ.