Atos 18:3-26

³Mame okynã kynexine moroto toto maro. Mokaro maro toerohse roropa ynororo serãtu riry poko, zuaro toexiryke.

⁴Mame oserematohae rokẽ juteu tõ amorepase ytosene atamorepatoh taka, kyreku tõ maro, toto tuarõtanohpõko Jezu poko.

⁵Morarame Masetonia poe Xira tõ tooehse ahtao Timoteu maro, toerohkehse Pauru serãtu riry poko kokoro rokẽ juteu tõ amorepatohme. —Jezu mokyro Kyrixtu, Ritonõpo mũkuru nymyry, tykase ynororo.

⁶Mame Pauru zehno toehse juteu tomo. Azahkuru tozuhse eya xine. Naeroro tupõ tytohtohmase Pauru a turumekary waro mokaro ehtohme. —Awãnohporykohtao Ritonõpo a, “Oya roro xine,” ãko ase, Jezu poko ãmoreparykõ se jexihpyryme. Taroino juteutõkara a ytõko ase, tykase Pauru eya xine.

⁷Morara kaxĩpo toytose ynororo Tixiu Juxitu tapyĩ taka. Juteukara mokyro, Ritonõpo omipona exikety. Itapyiny osepona ro kynexine juteu tõ atamorepatoh maro.

⁸Mame Kyrixpu juteu tõ atamorepatoh esẽ kynexine. Jezu tonetupuhse eya tosẽme, itapyĩtaõkõ maro. Tuhke morotõkomo a Pauru omiry etaryke tyya xine Jezu tonetupuhse. Mame tõpurihkase toto.

⁹Morarame Pauru koko tõsenehse. Ynara tykase sã Jezu Pauru osenety, —Enaromyra exiko. Ypoko oturukehpyra exiko. Poremãpyra exiko.

¹⁰Amaro jexiryke opoko pyra imehnõ mana. Oryhmara mã toto. Tuhke tarõkõ ypoetoryme exĩko mana, tykase Jezu Pauru osenety.

¹¹Moroto Pauru okynahxo kynexine toiro jeimamyry zokonaka morotõkõ amorepary poko Ritonõpo omiry poko.

¹²Morarame terekatume toehse Kario ahtao Kyrexia po, tõximõse toto juteu tomo Pauru apoise, arotohme terekatu a.

¹³Ynara tykase toto, —Mose Ritonõpo poko tyoro sã amorepato, kuesẽkõ omipona pyra kuehtohkõme, tykase toh repe.

¹⁴Tõtururu se Pauru kynexine repe. Yrome Kario ynara tykase juteu tomo a, —Etatoko pahne juteu tomo, imepỹ totapase ahtao eya ẽmary ãpuruhpyry taka, õmipona xine exiry.

¹⁵Yrome atamurukõ omihpyry omipona pyra ahtao oty kara, anapoipyra ase. Morohne poko kary etary se pyra ase, tykase mokyro Kario.

¹⁶Moro tae mokaro taropose ropa eya.

¹⁷Morarame Soxitene tapoise kyreku tomo a. Mokyro juteu tõ atamorepatoh esẽ roropa kynexine. Typipohse eya xine terekatu ẽpataka, yrome Kario oty kara kynexine.

¹⁸Moroto ro Pauru tuhke tynyhse. Morotoino tõsekazumaxĩpo Jezu poetory tomo a toytose ropa Pauru, wapu ae, Xiria pona. Imaro toytose Pirixira, Akira, enara. (Moroto tũsety tysahkapose ropa Pauru a Sẽkerea po. Ajohpe pyra tonetupuhtohme imehnomo a tõturutopõpyry poko Ritonõpo a.)

¹⁹Morotoino Epezu pona toytose toto. Moroto tymarõkõ tynomose eya Pirixira, Akira, enara. Mame juteu tõ atamorepatoh taka Pauru toytose, morotaõkõ maro oturuse.

²⁰—Yna maro taro exiko, tykase toto Pauru a repe. Yrome moroto tuhke tynykyry se pyra kynexine.

²¹Tõsekazumase ropa ynororo. —Oehnõko ropa ase oya xine, Ritonõpo a jenyokyry ropahtao, tykase ynororo eya xine.

²²Morotoino toytose ynororo wapu ae Sezarea pona. Morotoino Jerusarẽ pona toytose. Moroto Jezu poetory tõ maro tõturuxĩpo Ãtiokia pona toytose Xiriapõ pona.

²³Moroto tuhke tynyhse ynororo. Morotoino toytose ropa Karaxia poro, Piritia poro roropa, Jezu poetory tõ ãkyemaporyme.

²⁴Morarame juteu toytose Epezu pona, esety Aporu. Arexãtyria pata po aenuruhpyry kynexine. Kure urutõme exikety ynororo, orẽpyra amorepatono Ritonõpo omiry poko.

²⁵Mokyro tamorepase kure kynexine Ritonõpo omiry poko. Imehnõ amorepaneme kynexine tãkye samo. João ahno ẽpurihkane namorepatopõpyry poe rokẽ ahno ẽpurihkary waro ynororo kynexine. Yrome Ritonõpo zuzenu omomyry waro pyra ro, Jezu poetory aka kynexine.

²⁶Mokyro tãkye sã tõturuse juteu tõ atamorepatoh tao. Autururu totase Pirixira tomo a. Morarame tõturukehse ahtao, tarose ynororo eya xine tytapyĩkõ taka kurehxo amorepatohme tyya xine.