Atos 15:16-36

¹⁶“Ritonõpo ase. Tuisame Tawi tyrise ya. Yrome ipakomotyã tutuisake pyra toehse toto. Tãtahpahse toto. Imeĩpo toto eahmãko ropa ase Tawi parỹpyry poetoryme toto ehtohme. Patãpo kurãkary ropa sã toto kurãkãko ropa ase.

¹⁷Morarame imehnõ jenese oehnõko emero pata tõ poe, juteutõkara roropa, jomipona toto ehtohme, Umũkuru poetoryme toto ehtohme. Morara ãko Kuesẽkõ mana,

¹⁸pake moro poko tuarõtanohpohpono,” me tymerose pake.

¹⁹—Naeroro ynara enetupuhnõko ase, juteutõkara Ritonõpo poetoryme se ahtao, toto onẽkoropyra sehtone.

²⁰Pape rokẽ saropotone inenerykõme tuaro toto ehtohme. Ynara symerotone, “Ahno nyrihpyry Ritonõpo myakãme mokyro zotỹpyry onõpyra ehtoko. Oorypyrykõ poko pyra roropa ehtoko. Imehnõ nohpo tõ poko pyra ehtoko. Opyxiãkõ maro rokẽ ehtoko. Esenãtyã onõpyra ehtoko, munu onenahpyra roropa ehtoko, enara.” Morara rokẽ symerotone mokaro neneryme, tykase Tiaku eya xine.

²¹—Ynara exiryke Moeze omihpyry poko amorepatõkõ nae emero pata tõ punero. Oserematohae rokẽ Moeze nymerohpyry sekeremãko mã toto juteu tõ atamorepatoh tao, tykase Tiaku eya xine.

²²Morarame Jezu poetory tõ maro Peturu tõ tõximõse tahtao xine orutua kõ tymenekase eya xine tynenyokyrykõme Ãtiokia pona Pauru tõ maro. Juta te, Xira te, enara. Juta esety akorõ Pasapa. Mokaro imehxo kynexine tunomamehxo Jezu poetory tõ rãnao.

²³Ynara tymerose toto a Ãtiokia pona tynaroporykõme, “Yna nymerohpyry moro. Ynanase Jezu poetory tomo, Jerusarẽpõkomo. Ritonõpo omiry poko amorepatõkõ ynanase. ‘Kure pãna matou,’ kary se ynanase oya xine, Jezu poetory tomo a, juteutõkara a Ãtiokiapõkomo a Xiriapõkomo a, Xirixiapõkomo a, enara.

²⁴Imehnõ orutua kõ ytotopõpyry taroino oerekohmase xine totase yna a. Ynara kary ynanetase, ‘Juteutõkara aĩkõpotapihpyry sahkapõko monexiã toto,’ kary ynanetase. Moeze omipona orirykõ se toto exiry ynanetase roropa. Mokaro anaropopyra ynanexiase. Tamoreme xine rokẽ nytoase toto.

²⁵Morara exiryke oximõme ynanase ourunanõkõ aropotohme myaro yna ekyry kurã maro Panape tõ maro oya xine.

²⁶Osepynotokõ kara Panape tomo, Pauru maro. Ritonõpo omiry poko zehnotokõ amorepane toto.

²⁷Morara exiryke Juta tõ aropõko ynanase Xira maro ouruse xine senohne poko, ynanymerohpyry poko, zuaro oehtohkõme.

²⁸Ynara exiryke Ritonõpo zuzenu omi poe oẽkororykõ se pyra ynanase. Ynara rokẽ ãko ynanase oya xine,

²⁹Joroko tõ zotỹpyry onõpyra ke ehtoko. Munu onenahpyra ehtoko. Esenamyhpyry onõpyra roropa ehtoko. Nohpo tõ poko pyra ehtoko roropa. Opyxiãkõ maro rokẽ ehtoko. Morara awahtao xine iirypyryme pyra matose. Enara.” Morara tymerose Jerusarẽpõkomo a.

³⁰Mame tonyohse toh rahkene Xira tomo Ãtiokia pona, pape arose. Mame moroto Ãtiokiapõkõ tõximõse ahtao pape tokarose eya xine, Jerusarẽpõkõ naropohpyry toto neneryme.

³¹Moro eneryke tyya xine morotõkõ tãtãkyemase toto.

³²Mame Juta tõ tõturuse Jezu poetory tõ maro, urutõkõme toexirykõke Ritonõpo poe. Toto omiry etaryke eanokõ tyjamihtase.

³³Morotoino tuhkehxo tynyhse tahtao xine, —Ytõko ropa ynanase, tykase Juta tomo tõsekazumase ropa toto a morotõkomo a. —Ytõko ropa matou? tykase morotõkomo. —Kure rokẽ ytotoko ropa, tykase toto, toto eramary ropahtao.

³⁴Yrome moroto rokẽ se Xira toehse aporo.

³⁵Yrome Pauru tõ tõxinomose moroto Ãtiokia po imehnõ amorepãko, Ritonõpo omiry poko. Imaro xine tuhke moroto amorepatõ kynexine Ritonõpo omiry poko imehnõ amorepananomo.

³⁶Mame tuhkehxo tynyhse moroto tahtao xine, ynara tykase Pauru Panape a, —Eropa ropa, tykase. —Kuekyry tõ senetase ropa pata tõ poro, Ritonõpo omiry ekarotopõpyry punero kyya, tykase.