Atos 12:19-24

¹⁹Peturu tupipose Erote a repe. Yrome onenepyra ropa tokurehse toto. Morara exiryke Erote a Peturu tokaropose soutatu tomo a repe. Mame onekaropyra tokurehse toto ahtao totapapose toh emero Erote a, Peturu eraximahpõkomo. Moromeĩpo Jutea poe toytose ropa Erote Sezarea pona. Moroto tõsesarise ynororo.

²⁰Morarame Xitõpõkõ poko tyekĩtapãse Erote kynexine, Tiropõkõ poko roropa. Morara exiryke tỹkyryry taropokehse eya Xitõpõkomo a, Tiropõkomo a, enara. Morarame topeme Paraxitu tyrise toto a, Erote tapyĩ esemy. Mame ynara tykase toto eya, —Kaxiko Erote a, “Tyzehno xine oexiry se pyra Tiropõkõ mana Xitõpõkõ maro,” kaxiko Erote a, tykase toto Paraxitu a. Tỹkyryrykõ se rokẽ toh kynexine Erote a. Mame tõturuse roropa toto Erote a.

²¹Morarame imoihmãkõ tãtãnonohse Erote otururu etase. Mame tupõ kurã amuruxĩpo tapõ pona typorohse ynororo tõturutohme mokaro netaryme. Tõturuse rahkene.

²²Mame aomiry etaryke tyya xine tõmitase toto opore, —Ritonõpome nase, ahnome rokẽ pyra, tykase toto Erote poko repe.

²³Morarame mokaro omiry etaryke tyya Erote zehno toehse Ritonõpo. “Arypyra ase Ritonõpo rokẽ imehxo mana,” kara exiryke. Naeroro Erote totapase rahkẽ Ritonõpo nenyokyhpyry a. Moromoro a tuhmokapose. Toorihse.

²⁴Morarame Ritonõpo omiry tokãtose itamurumehxo. Tuhkãkõ aomipona toehse.