Apostolo 5:22-40

²²Rehano zeḡeꞌa ḡuꞌa neḡano feurirotene, apostolo azaḡa mene horoziro. Eꞌanoꞌo bare onamadu, zinaꞌa,

²³“Ḡuꞌa neḡa ibihetaḡaꞌe fairu biroga, zu ḡuꞌa neḡa gadineꞌeteꞌe azaḡaꞌe ibihetao edauꞌenoga horoneha. Rehano ibiheta vavaꞌatene, zamaḡanoꞌe vaze ꞌahoga mene horoneha.”

²⁴Eꞌe hariḡa igirotene, Dibuꞌo Neḡa ḡianeꞌeteꞌe boro zu dibuꞌo hauꞌeteꞌe boroboroꞌe eꞌe haḡaiḡanonoꞌo naginiꞌa fureraꞌ onamiꞌuma, rae zamare ꞌadaꞌadaziro.

²⁵Ebu vaze ꞌahoganiꞌa onaadu, ziro, raenaꞌa, “Ḡianoꞌi! Zaeꞌa ḡuꞌa neḡano ohozateꞌe azaḡaniꞌe Dibuꞌo Neḡa zamaḡano edanadu, vaze ihozeꞌohe.”

²⁶Eꞌanoꞌo Dibuꞌo Neḡa ḡianeꞌeteꞌe boroꞌa ane tahiꞌa teite onamadu, apostolo azaḡa tutuze bare onairo. Ze mene agato ziniro, mazaḡa vaze rihoziro, iḡite vazevazeꞌa maḡunadu hadi hina zimi ruziꞌuma rihoḡa.

²⁷Ebu apostolo azaḡa tutuze onairotene, kanisoro azaḡa zamao ohoziro, ebu dibuꞌo hauꞌeteꞌe ḡihiꞌaḡaniꞌa ḡadiziro, raenaꞌa,

²⁸“Eme goro ḡoeꞌa riḡa zae ziniro, vaze ꞌadi niḡano vazevaze mene ihozoga. Rehano Ierusalema azaḡa niduꞌa zaeꞌa ihoze hauḡadu, vaze eꞌeꞌa rudaroteꞌe adugaꞌe emeḡe rana tiꞌohe”

²⁹Petero zu apostolo azaḡaniꞌa naenaezinaꞌa, “Eme Badiꞌa ḡoere igiꞌuma, u vaze ḡoereꞌe mene igiꞌuma.

³⁰Iesuꞌe zaeꞌa satauroo midau teadu rudaro rehano, vouḡafeꞌa kurano haudoteꞌe Badiꞌaḡaniꞌa runeonoꞌo bare ḡaboniro.

³¹Izidi eꞌe vazeḡaꞌe vaze ibito ziniꞌuma Zuhiꞌaḡa, zu vaze ḡaboziꞌuma vazeḡa radu, Badiꞌaꞌa ane edaꞌe moneo ohoniro. Aꞌe Isaraela azaḡaniꞌa zamaze ḡihunadu, sauꞌaze Badiꞌaꞌa rae modoga veize.

³²Emeꞌe eꞌe haḡaiḡa horonadu rae fureneꞌohe, zu Vine Zaḡoḡa zuni eꞌe rae fureneꞌohe. Vine Zaḡoḡaꞌe Badiꞌaꞌa ane ḡoere igiꞌeteꞌe azaḡa mazao tuḡuniro.”

³³Kanisoro azaḡaniꞌa Petero ḡoere igirotene, maḡune rudaro, ebu zimi ruzihi reiro.

³⁴Rehano Farisea vazeḡa ꞌahoga, niḡa Gamalielaꞌa kanisoro azaḡa boꞌaḡano iḡune edaro. Aniꞌe goro ḡoeꞌa ihozeꞌeteꞌe vazeḡa, ebu vaze niduꞌa ani gubaniro. Ani zinaꞌa, “ꞌAhi duḡuru gezo enona tuḡuze buzoꞌi!”

³⁵Ebu aneꞌa kanisoro azaḡa ziro, raenaꞌa, “Isaraela azaḡa, fairu zamaroꞌi, ꞌadi duḡuru mazao nagini haḡaihi raꞌetaꞌaꞌe!

³⁶Muri nu onamiroteꞌeꞌa, Teudaꞌa iḡunadu, 'Eꞌe nihe boro' radu, vaze maḡa ḡazaḡaniꞌa (400) ani hegotiro. Rehano aniꞌe mau runiro, ebu ani hegotiroteꞌe azaḡa niduꞌaꞌe ferefereꞌuhiro. Ebu aniꞌa haḡaidoteꞌe haḡaiḡaꞌe niduꞌa hauḡiro.

³⁷Ani ḡarugano, vaze niduꞌa ni meiroteꞌe (census) madaḡano, Galilea vazeḡa niḡa Iudaꞌa iḡunadu, vaze nu zamazadu Roma gavamani teite utitihi reiro. Rehano ane zuni mau runiro, ebu ani hegotiroteꞌe azaḡaꞌe ferefereꞌuhiro.

³⁸Eḡe iradugu ḡoeꞌa ꞌahiꞌeꞌe. ꞌAdi duḡuru mazao ḡau ꞌahoga ago haḡaoꞌi! Tuḡuze buzoꞌi! Mazaḡa haḡai ꞌadiꞌe vaze mazaonoꞌo reineꞌe, aneꞌa hauḡiꞌuma.

³⁹Rehano haḡai ꞌadiꞌe Badiꞌa mazaonoꞌo reineꞌe, za ꞌuoga mene idaraꞌuma, zu zaꞌe Badiꞌa utito haꞌuma.”

⁴⁰Ebu zeḡeꞌa Gamaliela ḡoere mae ḡihiniro, ebu apostolo azaḡa huze zouzadu, uti azaḡaniꞌa masiziro. Ebu “Iesu niḡano ago ḡoeroꞌi!” rae zeadu, tuḡuze buziro.