Apostolo 28:5-20

⁵Rehano Pauloꞌe mohe ire roga rana itine modiro, ebu sauꞌani ꞌahoga ane mazao mene fureraro.

⁶Vaze ze ꞌane, Pauloꞌe ahiꞌaniꞌa miniꞌuma ga zogone higau bauradu rudaꞌuma rae ḡiane radiro. Ze faḡa hune ꞌouge ḡiane radiunu rehano, ḡauni ꞌahoga ani mazao mene furerarotene, ze hena nufe zamarenaꞌa, “Aniꞌe badiꞌa ꞌahoga gaogi.” reiro.

⁷U ꞌumu eꞌe zuhiꞌaḡa, niḡa Pobelio, ani habaꞌe haniꞌano. Ani eme mae ḡihifeꞌenaꞌa, neḡano tutufe zoufadu mada uḡidu faifaifinu.

⁸U Pobelio mogaꞌe ugiḡa, evaneo baze radiunu. Ani ahiriꞌe gigiꞌa bagaḡa zu ru sororido. Eꞌanoꞌo Pauloꞌa diuḡe ḡianadu rana kuraro, ebu ꞌevoꞌa rana tirotene, ꞌai manoriro.

⁹ꞌUguḡaniꞌa furerarotene, ugi azaḡa ꞌumu beꞌa radiunuteꞌe azaḡa niduꞌa, Paulo vaḡe onaadu aneꞌa faizido.

¹⁰Ebu vaze niduꞌaꞌa, nigufeꞌenaꞌa faifaife rufido. Ebu eꞌe ꞌumuḡanonoꞌo ruhau vaḡinihi reirotene, ze ferefeꞌeteꞌe toheḡa ḡehaḡa rifiro.

¹¹Eme bato uḡidu eꞌe ꞌumuḡano radiroteꞌe enogano, ḡasi ꞌahogano tiradu eꞌe habaꞌa mode iḡuniro. Eꞌe ḡasiḡaꞌe nahune madaḡaniꞌa hauḡoga veize, Melita ꞌumuḡano guhiu radiro. Aꞌe Alesandria ne ḡasiḡa, niḡa “Tahiꞌa Atoꞌa”. Izipi habaꞌanonoꞌo onairo.

¹²Eme ruhau onamoo, Surakusa neḡano hebetadu, mada uḡidu eꞌea radiro.

¹³Eꞌeanoꞌo hena onamo Regio neḡano hebetiro. Ebu mada tiba radirotene, ḡasi ḡaruga moneonoꞌo zavaraꞌa onairo ꞌahine, eme ruhau onamadu, mada aheuḡano Puteoli toḡatoḡaḡano feuriro. Aꞌe emeḡe ruhu ḡonaga.

¹⁴Ebu eꞌea Zuhiꞌa Boro mone azaḡa nu hidirotene, ze umifenaꞌa, “Emeḡe teite fura tiba radoꞌi!” reiro. Eꞌanoꞌo eꞌea fura tiba radiro. Ebu eꞌe ḡaruganobuꞌu emeꞌe, zavara boro uꞌano sasiro rehano, ragavofeꞌe ḡonabadu, Roma habaꞌano feuriro.

¹⁵Roma neḡano Zuhiꞌa Boro mone azaḡaꞌe emeḡeꞌa haniteꞌeteꞌe hariḡa igiro ꞌahine, haofe onaadu, vaze nuꞌe Apia-foru maketiḡano, nuꞌe Taveni Uḡidu rae huneꞌeteꞌe iꞌudi neḡano hido titiro. Paulo ani, horozirotene, Badiꞌa matuꞌo haro, ebu zamaḡaniꞌa inariro.

¹⁶Eme Roma neḡano feurirotene, Pauloꞌe tuḡunadu ane daꞌo ne ꞌahogano radiro. Ebu uti vazeḡa tibaniꞌa daꞌo taufinu.

¹⁷Ebu mada uḡidu meirotene, Pauloꞌa Iuda azaḡa ibito ziniꞌeteꞌe azaḡa boroboro ane neo huze nuꞌoziro. Ebu zeḡeꞌa nuꞌoraꞌ onairotene, Pauloꞌa ziro, raenaꞌa, “Nego nabudi, e emeḡe nabudi mene sausauziro, zu vouḡafe haḡai mene heꞌeheꞌeniro. Rehano Iuda azaḡaniꞌa Ierusalema neḡano obohe teadu, Roma azaḡa ꞌevorao riꞌiheha.

¹⁸Roma azaḡaniꞌa ḡadihirotene, ze ura tuḡuhe buhihi reiro, mazaḡa runeo tuḡuhiꞌuma haḡaiḡa sauꞌa mene horoniro.

¹⁹Rehano Iuda azaḡaniꞌa mene uratirotene, eꞌe ibi ꞌahoga oꞌoꞌa radu, Roma zuhiꞌaḡaniꞌa kotahoga veize umidiro. U eꞌe aduga ꞌahoga nabudihe rana touga veize mene onaeha.

²⁰Eꞌanoꞌo e za ḡiazoga zu ḡorezoga veize huze onaeha, mazaḡa Isaraela azaḡaniꞌa guhine onainuteꞌe vazeḡa uꞌano, eꞌe ḡuꞌa neḡano ꞌada radiuꞌeteꞌe.”