Apostolo 14:8-17

⁸Aras Listara tiga tunotuno ga kis taar kaia. Di ga kahai ma ra pengpeng ie ma pa git hanahaan.

⁹Ga hanhadade ira nianga tane Pol. Io, Pol ga ngok dit tana ma ga nes bia ga uno mon nurnur bia na langalanga. Io kaik, Pol gaam tau ie ma gaam tange, “Tut ma nu tur!” Kaik at mon no tunotuno ga karwas tutur ma gaam tur leh wara hinahaan tubena.

¹¹Ing ira matanaiabar diet ga nes ing Pol ga gil, diet ga kakonga tano nianga Likonia bia, “Ira tadaar diet te hansur taar ta dahat hoing ra tunotuno tun!”

¹²Io, diet ga pas Banabas bia Sius ma Pol bia Hermis kanong warah git lulua ta dir wara nianga.

¹³No hala na lotu ta Sius ga tur taar mon aras nataman tano pise na hala. Ma no ut na gil lotu ta Sius ga kap hawaat ra tumatena bulumakau ma ra balaparik na purpur uram tano matanangas huat ta iakano pise na hala. Ga gil huo kanong aie tika ma ira matanaiabar diet ga wara tuntun kaike ra hartabar wara lalotu tupas dir.

¹⁴Ma ing bia ira iruo apostolo, Pol ma Banabas, dir ga hadade bia di ga wara gilgil huo ta dir, dir ga diris ira kiniasi dir wara hamines bia dir ga malok bia da gil huo ta dir. Dir ga hilau suur taar ta ira matanaiabar ma dir ga kakonga bia, “Ai! Waak muat ra gilgil kaike ra mangana linge! Mir mah mir airuo tunotuno mon hoing muat ma pai a tadaar mir. Mir kapkap hawaat ra tahut na hinhinawas tupas muat. Mir tangtange ta muat bia muat na tahurus talur kaiken ra linge bia mon, ma muat na talingane no lilona God nong ga gil no mawe, no ula hanuo ma no tes, ma ira mangana linge kenam narako ta dal.

¹⁶Nalua, ga waak se tar ira matanaiabar bia diet na mur ira udiet mangana tintalen.

¹⁷Iesen i la hamhamines hapalaine ira matanaiabar bia aie sige. Ma i gil huo hoken. I haminas no uno harmarsai ing i la tartar no bata meram ra hurmauho ma ing i tabar muat ma ira amuat nian ta ira udiet teka na minatuko. Ma ing i gil huo i hasoh muat ma ra nian ma i hahungi muat ma ra gungunuama.”