8Lisata yuu dokonya akali moko koo mende petea-pyaa. Baanya endangimi mandeamo gii ongopa moko koyapae mandea-pyaa. Yuu mendaipi mende baa kaitini napaenge-pyaa.
9Akali dokome Polome pii lao kateamo doko soo petea-pyaa. Polome akali doko kandokondape petala akali dokonya masoo miniamo dokome baanya moko auu pyaapomona lao masia-pyaa.
10Dopa lao masetala Polome puu lao baa lamaiyoo, “Emba sakatatala embanya moko dolapome tolao toya kata!” lea-pyaa. Dopa leamopa akali dokome yapa sakatao katapala kaita paya-pyaa.
11Endakali longo dupame Polome piamo doko kandatala Laikonia tangemanya pii lengeli pyoo puu lao lao, “Naimanya gote dupa endakali jetala naima-ketae epelyaminona,” leami-pyaa.
12Dopa latala endakali dupame Banapasa kenge Susa leami-pyaa. Polome enomba nyoo pii lenge dokonya baa kenge Emesa leami-pyaa.
13Taono dokonya pyakaenge kaita dosa sambo gote Susa lenge dokonya losuu anda mende katenge-pyaa. Susa dokonya pitisa dokome mena pulumakao ita diimi yati petae mendapua minao lome kambu dokonya ipupala endakali dupa-pipa Susa doko lao kundi maiyanya piami-pyaa.
14Dupame dopa pyaanya pilyamino lapae sepala aposele Banapasapa Polopa dolapome nyilyambonya yonge pee pingi dupa kanguopala endakali kateamino dokonya alo pyao epeambi-pyaa. Ipupala puu lao lao pituu, “Anematupa, aipuma dopa pilyamipi? Nalimba nyakama endakali kalyamino dopaleaka. Angi nanjepenge sambo gote datupa kayapala Gote lete katenge doko lao masoo minalapale lao Wai Pii Epe doko nyakama langilyambano. Baame yuupi, kaitipi, endakipi dee dupanya silyamo dupa pitakapi dupa wapuiya-pyaa.
16Wamba yuu gii dupa pitakanya baame endakali tata dupa pitakame masoo kaita payamino dupa paena kaya-pyaa.
17Dopaka doko, Goteme baa tange panasoo kalai epe dupa pyoo katenge. Kaiti-kisa katao aiyuu epenge dupapi nee tata dupa epasekenge gii dupapi dupa baame nyakama-kisa epena lekenge. Baame nee epepa mona lyuu lengepa dolapome nyakama tiaka pisekelyamona,” leambi-pyaa.
Aposole 14
Aposole 14:8-17