Apostolo 11:6-25

⁶Eḡeꞌa faine ḡianirotene, rahao odaḡa ḡazaḡa maniḡa nunu, agire maniḡa, dareꞌeteꞌe avazoḡa heuḡa zu adure niniḡa nunu ḡehaḡa horoniro. Aꞌe emeḡe, Iuda azaḡaniꞌa mene auꞌeteꞌe bonariḡa.

⁷Ebu ago ꞌahoga igiro, raenaꞌa, 'Petero, iḡunoꞌi! Manadu anoꞌi!'

⁸Ebu eḡeꞌa raenaꞌa, 'Zuhiꞌa Boro, a mene hune zu idaḡa! Eꞌe Iuda azaḡa goro ḡoeꞌa zamaḡano mene deheḡa ga sauꞌa raꞌe huneꞌeteꞌe bonariḡa eḡe hebeo mene au onaido.'

⁹Rehano ago ꞌahoganiꞌa adureonoꞌo bare naenaehiro, raenaꞌa, 'Badiꞌaꞌa dehenateꞌe bonariḡaꞌe ufire rae ago roꞌi!'

¹⁰Eꞌe haḡaiḡaniꞌe ḡae uḡidu fureraro. Eꞌe ḡarugano bone dabua rafaḡa zu eꞌe rana tiroteꞌe ḡauḡa niduꞌa adure ḡoha bare mae itiro.

¹¹ꞌOugiroteꞌe zamaḡano Kaisarea neḡanonoꞌo tuḡuziroteꞌe vazeḡa uḡiduꞌa eḡeꞌa radiroteꞌe neḡano feuriꞌ onairo.

¹²Ebu Vine Zaḡoḡaniꞌa ihinaꞌa, 'Zeḡe teite onamoꞌi! Zeꞌe Iuda mene azaḡa rehano, ago zamare ꞌadaꞌadoꞌi!' Ebu Zuhiꞌa Boro mone azaḡa fuꞌo zu tiba fare (6) ꞌadaꞌa ḡatihenaꞌa, Kaisarea neḡa ovoiro. Ebu emeꞌe eḡe veize ḡoere tuḡuriroteꞌe vazeḡa neo feuradu diuḡiro.

¹³Ebu eꞌe vazeḡaniꞌa ane neo tuḡure vigaꞌa nouge nouge fureraroteꞌe hariḡa rae furenofiro. Aneruꞌa ꞌahige rae niro, raenaꞌa, 'Iopa neḡano vaze nu tuḡuzoꞌi, ebu vaze ꞌahoga niḡa Simona zamahanoꞌi! Niḡa ꞌahogaꞌe Petero.

¹⁴Aniꞌe hari ꞌahoga rae fureno ziniꞌuma, ebu ḡae zu ḡae neo radiuꞌeteꞌe azaḡa niduꞌaꞌe eꞌe egadu ḡabone hidiꞌuma.'

¹⁵Ebu eḡeꞌa ḡoere ḡadahirotene, Vine Zaḡoḡaniꞌa zeḡe vaḡe ovairo, ibite emeḡe vaḡe ovairoteꞌe teige.

¹⁶Eꞌe horonirotene, e Iesuꞌa ifiroteꞌe ḡoeꞌa zamariro, raenaꞌa, 'Ioane Babatisoꞌe vu hina bapatizoziro, u zaꞌe Vine Zaḡoḡa hina bapatizoziꞌuma.'

¹⁷Ebu emeḡeꞌa Zuhiꞌa Iesu Keriso mazao fiiroteꞌe madaḡano Badiꞌaꞌa ḡahunone rifiroteꞌe teige, Iuda mene azaḡa zuni ḡahunone ziniro. Eꞌanoꞌo eꞌe Badiꞌa haḡai ꞌuoga mene hune idaḡa.”

¹⁸Zeḡeꞌa eꞌe igirotene, mene bare ḡoeriro, rehano Badiꞌa niguneꞌenaꞌa, ꞌahige reiro, raenaꞌa, “Tena, Iuda mene azaḡa zuni Badiꞌaꞌa zamazadu, ḡabone tuḡutuḡu mouga veize zamaze sauꞌanonoꞌo ḡihuziro.”

¹⁹U Stefano maroteꞌe madaḡanonoꞌo Iesu mazao fieꞌeteꞌe azaḡa mazao agireꞌa fureraro. Eꞌanoꞌo zeꞌe Ierusalema neḡanonoꞌo feranadu, Poinikia habaꞌa, Kupro umuḡa, zu Suria habaꞌano Antioka neḡa onamiro. Zeꞌe Iuda azaḡa mazao daꞌo hari manoḡa harameꞌenaꞌa feraro.

²⁰Rehano Kupro zu Kurene azaḡa nuꞌa Antioka neḡa onamadu, Giriki azaḡa mazao zuni Zuhiꞌa Boro Iesu hariḡa haramiro.

²¹Ebu Badiꞌa gigiꞌaniꞌa zeḡe ranao radiunu ꞌahine, vaze ḡehaḡaniꞌa haramoze mae ḡihinadu Iesu mazao fiiro, ebu Zuhiꞌa Boro mone reiro.

²²Eꞌe hariḡa Ierusalema ekalesia azaḡaniꞌa igiro. Ebu vaze ꞌahoga niḡa Banabasi tuḡune onamiro, Antioka neḡa.

²³Ani Antioka neḡano feurirotene, Badiꞌaꞌa ḡahunone manoḡa zenateꞌe horonadu, matuꞌe rudaro. Ebu zeḡe niduꞌa inaraziro, raenaꞌa, “Zamaze niduꞌa hanadu Zuhiꞌa Boro mazao fie gigaru radoꞌi!”

²⁴Mazaḡa Banabasiꞌe vaze manoḡa zu Vine Zaḡoḡaniꞌa ane mazao iriꞌaviro, zu Zuhiꞌa Boro mazao hubehune fieꞌeteꞌe vazeḡa. ꞌOugadu vaze ḡehaḡa bagaḡaniꞌa Zuhiꞌa Boro moneo reiro.

²⁵Eꞌebuꞌu Banabasi ani, Saulo vaḡoga radu Taso neḡa onamiro.