MII GUN MIINU MO 11:6-25

⁶Dhali ki aha/ dina mmohil a’di ka ’thime/ mo tani dhali mmokulum gwo ibwa mo tani aha/ mishkina ap̱o/ a’di mo to/e kun ’kona sho’k do doŋon kun ta kuny ’cesh mo dhali tombwaasho mo dhali to kun paarana ’cesh mo dhali ’dii kun p̱eni momis mo be.

⁷Dhali aha/ ciḵa ’twa/ si’da/ jin o gwo i aha/ mo ki: Cuyi mis mo ma, Buṯerus, dhali ’koshi ma dhali ’kayi mo.

⁸Hili aha/ ona gwo mo ki: Yisa wakana Tap̱a haali/ toŋ kamu/ jin ga/u walla toŋ kamu/ jin dinuki thoson me’d jin onu mmomii mo tani a’di yisa ya’di ’twam pem me’d ’deya.

⁹Hili ’twa/ thoḵu mo me’di su/ ’peni momis mo ki: A’di jin thoson ma Arumgimis ki dhelel dhelel mo tani dhalku/ ki kar a’di ki to jin ga/u mo ma.

¹⁰Dhali a’di miinu me’di kwara mo. Dhala ris to budhu e momis doḵ/e mo.

¹¹Dhali hili mo mo ma, ’kwaniŋ gwasi kwara doshkin ibwambor gu’b jin ’kona aman nycine/ mo tani mmohashkunu uni ’peni Paŋ Kaysariyya i aha/ mo.

¹²Dhali Shi/in ṯu’c aha/ mmonyaḵ ya ki uni mo ki dar gi gwon dhaŋ mo. Dhali unim pe’de/ gwansan si’da/ ’pena waḵ mo tani nyaḵ ii ki aha/ mo. Dhali am sekina gu’b wathi/ mo be.

¹³Dhali a’di ṯorki aman gwo mo mmop̱ara a’diya man’doyu gwo e mo mmodosh igu’b piti mo dhali o gwo mo ki: Hashi gwo e Pan Yaap̱a mo ma mmoyuḵa Simaan jin yuḵu ki gwaya kamu/ ka Buṯerus mo

¹⁴jin midi o /e gwo mo, gwo kun minu woṯẖ /e mo ki kuŋ gu’b pini ilu/ mo.

¹⁵Dhali me’d jin ṯelka/ gwo ’pen mo mmo/o mo tani Shi/in Dheleladhelel yayi’da p̱o/ uni mo me’d jin yakina a’di ap̱o/ ana ka muŋ’kup̱ mo be.

¹⁶Dhali aha/ kana gwon Tap̱a e mo mmo/ona a’di gwo mo ka: aYohaan ka jiŋ gana/ mii’da mii ki yi’de/ mo tani hili um minu mii ki Shi/in Dheleladhelel mo be.

¹⁷Waḵki/ Arumgimis ki c̱i uni to jin c̱inu ki me’d kansan mo tani me’d jin miina a’di si’da/ gom ana ki ana gamkina Tap̱a Yesus jin ta’da Ḵrisṯẖos gwo is mo tani aha/ tana aja sa/ jin miga/ mish roc̱a Arumgimis mo?

¹⁸Dhali ki uni ciḵ to gwansani ’baar mo tani uni bu’th moŋḵu’th is mo dhali kara Arumgimis ki ca mo mmo/o gwo mo ki: Hili ’kwani kun ’koki ta ’Kwani Yahuuda/ si’da/ c̱in ma Arumgimisa du mo mmori’c is mo ntagi moŋ’koki/e mo be.

¹⁹Uni si’da/ kun c̱ekerki bwa mo gom monṯo’c bwa jin piki’d mo goma Isṯip̱anuus mo tani iikin mo ntagi Pam P̱iniikiya mo dhali Paŋ Kuprus mo dhali Pa Anthaakiya mo mmo/o gwo ki kun tiya yisa, hili ki jasi ’kwani kun ta ’Kwani Yahuuda/ mo.

²⁰Hili kun tiya ’koni bwam uni kun ta ’Kwani gi Paŋ Kuprus mo dhali Paŋ Kerawaan kun o ki ’Kwaniŋ Griḵi si’da/ mmoṯor gwon Tap̱a Yesus me’dyin iiyina uni e Pa Anthaakiya mo be.

²¹Dhali me’d gi Tap̱a di’d e uni mo dhala waambuhany ’kwani caaca mo kun gam gwo is mo kun ṯu’kkin e Tap̱a mo.

²²Dhali gwonṯor yan yayi’di ’ceŋ ’kwaniŋ ḵaniisa jin di’d e Pa Urushaliim mo, dhali uni hashkina Barnaaba ntagi Pa Anthaakiya mo

²³jin ’bora bwa mo me’dyin p̱u’da/ a’di mo, dhali a’the ma Arumgimis mishkina a’di mo be. Dhali a’di malaski uni ’baar mo ki gwo mo, ki gwo kun dhuna uni adu mo mina uni ’dim ’kup̱ gom Tap̱a mo.

²⁴Haali/ a’di ta wathi/ jin ’boro’d mo dhali jin ’tu’du/ mo ki Shi/in Dheleladhelel mo dhali ki moŋgam gwo is mo dhali ’kwani ka ris maru is e Tap̱a mo.

²⁵Dhali a’di yaki’d mo e Pan Tharsuus mo mmoŋap̱a Shawuul mo