Aposole 24:3-23

³Dopa pipumu dokonya naima pitakame koteaka lao eteteaka mona epe palyetala emba kandao etete yaka pilino lelyamano.

⁴Dopana, nambame pii longo latosa emba maka kayatena naimanya pii kuki mende emba langitoo embame mona epe paliuu sakape.

⁵Naimame akali dake kandamanopa yama makongapae mende lamo. Baame Juta endakali yuu wakale wakale katenge dupa pitakanya mona koo palisakamaiyoo pundu sakatasoaka katenge. Nasatete tange Jisasa tata wakale katenge dokonya baa aiyomba joo kalyamo.

⁶Baame losuu anda andake doko koyasalanya makande peteamoaka doko, naimame baa miniama. Minatala naimanya mana setapae dupanya baa kosimi lawani kayama.

⁷Dopaka doko, yanda singi amii isingi mupa Lisiasa lenge dokome ipupala naima watao pyapala naimanya kingi pongo liangao nyia.

⁸Nyepala baame naima langyoo, nyakamame akali dake kosimi latami tamo kandao doko, emba-kisa laapape lea. Dopa leana embame akali dake pisetenopa naimame baa kandao kosimi lapenge dupanya tenge baa tangeme laapomona,” Tetalasa dokome dopa lea-pyaa.

⁹Juta dupame Tetalasame pii leamo doko kyoto injisoo, “Pii dutupa etete kiningina,” leami-pyaa.

¹⁰Dokopa kapomane andake dokome Polonya pii lena lao aiyomba ema piamopa Polome lao pituu, “Embame ee kana longo dupanya yuu dakenya kosa tolao lao kalyeno nambame kandengena, nambame mona epe paliuu embame salapeno lao dupanya pii yanu pyakamaitoo.

¹¹Namba Jetusaleme Gote lao tama pyaa peo doko kote kingi ita mende-kisa dee lapoma iki patelyamona, embame datupa piseteno kandao doko, kapa pao salapeno.

¹²Nambame Jetusaleme losuu anda andake kame dokonya akali mendepa nambapa pii yanda pyoloo napiamba. Nambame Jutamanya losuu anda dupanyapi taono dokonyapi endakali mendapua nyoo limbao nakatewaka.

¹³Akali datupame namba kosimi lelyaminoaka doko, angi mende kapa pao emba-kisa laitaka pyoo laa nayalamino.

¹⁴“Dopana, nambame pii dake yapae napyoo langilyo: Jisasanya pii manapimi naima Juta dupa wakale katasingina lelyamino doko kiningi nambame mana dokoaka watao naimanya yumbange dupanya Gote doko lao tama pyoo mana setapae dupapi potopesa dupame pii pepa piamino dupa pitakapi dupa nambame masingi.

¹⁵Akali datupame endakali tolataepi koo pingipi dupa pitaka Goteme malunya sakatasetana lao masoo malisoo kalyamino mendai dopaka pyoo nambame apata masoo malisoo kalyo.

¹⁶Dokonya nambame endakali dupanya lengelyaapipi Gotenya lengelyaapipi dupanya koteaka lao mona mendai iki paliuu payatoo lao masetala lekeleke tao kalyo.

¹⁷“Ee kana mendatupa pateamopa nambame naimanya tata daa jingi endakali dupa opale mendapua maiyanya Jetusaleme pao pituu, Gote lao oapi epe mendapua kundi maiyanyaka peo.

¹⁸Pupala nambame dopa pyoo katao Jutamanya kaimala pipae kunalanya mana miningimali pyoo minao etapala losuu anda andake dokonya kateopa Juta mendatupame namba kandeami. Dokopa endakali longo mendapua namba-pipa pii lao limbao pilya pyana pyoo nakateama.

¹⁹Dopaka doko, Juta mendapua Esia katenge dupame ipao namba miniamina namba-kisa tenge mende sipyali kandao doko, akali dutupameaka ipao embanya enombanya kosimi lapimili auu pipyali.

²⁰Daa tamo kandao doko, namba kanjole dupanya enombanya kateo gii dokopa akali datupame nambanya koo pito kandatami mende emba langina.

²¹Wamba nambame akali dupanya kainanya katao pii mendai iki mende puu lao lao pituu, ‘Endakali kumapae dupa Goteme sakatasetana lao masoo minao kalyo leona, tenge dokonya iki dupame namba nyakamanya enombanya kosimi lelyaminona,’” lea-pyaa.

²²Akali Pilikisame Jisasanya pii manapi auu pyoale masingi dokomena baame Polo kosimi laa epeamino akali dupa lamaiyoo, “Amii isingi mupa Lisiasa lenge doko ipatamopa nambame nyakamanya kosa dake sakatona, malisalapa,” lea-pyaa.

²³Dopa latala baame yanda singi amii isingi mende lamaiyoo, “Akali Polo doko anjalakao anjala naenya, mee isoaka katao baanya kaita miningi dupame oapi dupa minao nisala ipataminopa kaita lyokao daa nalape,” latala Pilikisa baa pea-pyaa.