Aposole 10:8-30

⁸Ipateaminopa pii pitaka panao lamaitala baame akali dutupa Jopa yuu dokonya pena lea-pyaa.

⁹Taita dopa pyoo akali tepoma dutupa yuu taono Jopa dokonya tengesa joo epeaminopa kotaka andawai pungupungu dokonya Pita baa loma sala anda-kisapyakalyia-pyaa.

¹⁰Dopa petala baa lopo kayapala nee napuli lao masia-pyaa. Nee depa leaminopa Goteme Pitanya mona minao aloo pisiamopa baame lee manimanimi joo kaiti doko saa papa laloo piamo kandea-pyaa. Kandeamopa mendita mende isa epea-pyaa. Epeamo doko lapalapa jepae andake mende denge kitomende dupanya mendeme minatae katao pyandama-pyandama pyoo pyandea-pyaa.

¹²Dokonya moko kitomende katenge tata dupapi, kanopato tata dupapi, yaka tata dupapi tata tata dupa pitaka palepeta pyandeamo doko baame kandea-pyaa.

¹³Dokopa pii mende epeamo dokome lao pituu, “Pita, embame sakatatala pyao naa!” lea-pyaa.

¹⁴Pitame lao pituu, “Kamongo, namba etete daa! Paa mendaipi mende nambame nee kaimala pipae daa lao nee nyetae dupa nanengena,” lea-pyaa.

¹⁵Dopa leamopa dee lapo pyoo pii mende epeamo dokome lao pituu, “Goteme auu pinya setatamo dupa kandao embame kaimala pipaena nalape,” lea-pyaa.

¹⁶Dopaka pyoo paa tepomasa pyandatala dokopa lapalapa jepae doko yapa kaitinya nyokonyia-pyaa.

¹⁷Pitame lee manimanimi joo kandeamo dokonya tenge doko aipalepe lao masoaka peteamopa Koniliasame pena leamo akali dutupame ipao Saimonenya anda doko kutao kandatala anda kambusa kateami-pyaa.

¹⁸Katapala dupame pisoo pituu, “Anda dakenya akali opone Saimone Pita lenge doko pilyape?” leami-pyaa.

¹⁹Pitame lee manimanimi kandeamo doko masoo mee peteamopa Sipitisa dokome Pita lamaiyoo, “Wane! Akali tepomame emba kutilyaminona, emba sakatatala isa pyakana. Akali dutupa nambame epena lapusa epelyaminona, embame mona lapo napaliuu, akali dutupa-pipa awapa pupale puu,” lea-pyaa.

²¹Pita isa pyakanatala akali dutupa lamaiyoo, “Anematupa! Nyakamame kutilyamino akali doko nambana, tenge aipuma kutao ipamipi?” lea-pyaa.

²²Akali dutupame baa lamaiyoo, “Yanda singi amii isoo katenge akali Koniliasa dokome naima pupa lapya. Akali doko etete tolatae mende. Baame Gote lao paka kayao kalyamopa Juta dupa pitakame baa kandao akali epena lengema. Gotenya enjele mendeme baa lamaiyoo, ‘Koniliasame Pita emba baanya andaka ipupi latala pii lateno dupa setana,’ lapya-pyaana,” leami-pyaa.

²³Dopa lao lamaitiaminopa Pitame akali dutupa andaka epena latala kuka dokonya awapa paleami-pyaa. Yongama sakatatala Pita awapa peami-pyaa. Jopa tange masoo miningi kaiminingi mendapua-pipa awapa peamiaka-pyaa.

²⁴Pao kaitinisa palipala taita dopa pyoo Sisatia yuu dokonya pyakameami-pyaa. Dokopa Koniliasame baanya palu mendai dupapi kaita miningi dupapi dupa nyoo limbatala dupa-pipa malisoo kateami-pyaa.

²⁵Dopa pyoo kateamino dokonya Pita pao pyakamateamopa Koniliasame kandatala pao baanya moko kateamo dosa tombauli sepala baa tama pia-pyaa.

²⁶Dopaka doko, Pitame Koniliasa sakatasoo pituu, “Namba endakaliakana emba sakata,” lea-pyaa.

²⁷Dopa latala pii lama-lama pyoo andaka kolandeambi-pyaa. Kolandatala endakali longo limbao peteamino dupa Pitame kandea-pyaa.

²⁸Kandatala baame dupa lamaiyoo, “Nyakamame kandeami kandee. Juta mendeme tata waka dupa-pipa awapa limbala nayapenge. Tata waka kalyamino dupanya kanja napupengeakana daa latae silyamo. Dopaka doko, Goteme namba laitaka pyoo pituu nambame endakali mende kandao baa kaimala pipae lamo koo paleta lamo laa nayape lapya.

²⁹Goteme dopa lapumopa nambame tanga nalao nyakamame namba ipu laminoli pyoo epelyona, aipuma namba ipu lamipi?” lea-pyaa.

³⁰Dopa leamopa Koniliasame baa lamaiyoo, “Alembolya alemandi indupa naima pilyamano kiloko tepo gii dakepaleaka namba andaka loma soo peteopa akali yonge pee etete kyoo lapae pingi mende lee mendai ipao nambanya enombasa kateamo kandeo.