Iliga꞉felo꞉ 10:8-30

⁸Konilius elo꞉ dabu a꞉no꞉ imo꞉wo꞉ tambo malolo꞉ mia꞉sa꞉ga꞉, i a꞉no꞉ Yoba amisa꞉na iliga꞉fo꞉.

⁹Ho꞉len no amio꞉ iyo꞉ ha꞉na꞉la꞉ga꞉yo꞉, amisa꞉no꞉ ko꞉na꞉ma fa꞉la꞉doma꞉niki disi dowabikiyo꞉, Bida e Godemo꞉ sa꞉ma꞉ni, a fa꞉sa wa꞉la fa꞉la꞉ ane.

¹⁰E a꞉na siliki, maiyo꞉ alan dowabiki, ma꞉no꞉wo꞉ sofa꞉ki sa꞉la꞉sa꞉ga꞉, iyo꞉ ma꞉no꞉ soda꞉lab amio꞉, e ho꞉le ba꞉ba꞉.

¹¹Eyo꞉ ho꞉le ba꞉dakiyo꞉, Hebeneyo꞉ kolaita꞉sa꞉ga꞉, kelego꞉ nowo꞉ helebeso꞉g alan o꞉ngo꞉ ko꞉lo꞉ migif fa꞉la꞉da꞉in amio꞉ ta꞉lidota꞉ga꞉, ololo to꞉lo꞉lo꞉ ko꞉lo꞉ tindabi ba꞉ba꞉.

¹²Helebeso꞉g us amio꞉ no꞉ ko꞉li ko꞉lilo꞉ a꞉la꞉ta꞉ga꞉ sowa꞉ a꞉la꞉ta꞉ga꞉ o꞉ba꞉ ko꞉li ko꞉lilo꞉, Godeya꞉lo꞉ na꞉so꞉boka꞉ a꞉la꞉likilo꞉ saefa꞉ a꞉no꞉lo꞉ a꞉na delena ba꞉ba꞉.

¹³A꞉no꞉ ba꞉da꞉sa꞉ga꞉yo꞉, to nowo꞉ a꞉la꞉sio꞉, “Bida, ge dasima! No꞉ we yasala꞉sa꞉ga꞉ maiya!”

¹⁴A꞉la꞉sa꞉labiki, Bida eyo꞉ a꞉ma꞉la꞉bo꞉ a꞉la꞉sio꞉, “Alan, ne a꞉la꞉bo꞉ mada mo꞉dimidama꞉no꞉! Yu kaluwa꞉ ele difa꞉ usamilo꞉ ‘Na꞉so꞉bo’ a꞉la꞉do꞉ saefo꞉ a꞉no꞉ ne mada mo꞉nan.”

¹⁵A꞉la꞉sa꞉labikiyo꞉, towo꞉ emo꞉wo꞉ wa꞉ka a꞉sio꞉, “Godeya꞉lo꞉ ‘gemo꞉lo꞉ we nafa ko꞉lo꞉ o꞉li na꞉bika꞉’ a꞉la꞉do꞉ sio꞉ a꞉no꞉, giyo꞉ ma꞉no꞉ a꞉no꞉ Godeya꞉ siwa꞉l amio꞉ mogago꞉ a꞉la꞉likiyo꞉ sa꞉la꞉so꞉bo” a꞉la꞉sio꞉.

¹⁶A꞉la꞉dimida꞉lowo꞉wo꞉ otalen fa꞉la꞉dota꞉ga꞉, wigibo a꞉na꞉ka kelego꞉ a꞉no꞉ a꞉ma꞉la꞉ Hebene dia꞉gane.

¹⁷Bida eyo꞉ ho꞉le ba꞉ba꞉ a꞉ma꞉ ha꞉go꞉ kedelena, Koniliusa꞉lo꞉ iliga꞉fo꞉ kalu i a꞉no꞉ amisa꞉na fa꞉la꞉dowa꞉ta꞉ga꞉, Saimona꞉ ayo꞉ keda꞉i ya꞉ga꞉, a elo꞉ a꞉na fa꞉la꞉dowo꞉.

¹⁸Iyo꞉ a꞉na fa꞉la꞉dowakiyo꞉, “Saimon Bidayo꞉ wiyo꞉ saba?” a꞉la꞉ ho꞉le dabu.

¹⁹Bida eyo꞉ ho꞉le ba꞉ba꞉ a꞉ma꞉ ha꞉go꞉ o꞉kedelen amio꞉, Godeya꞉ Mamaya꞉yo꞉ emo꞉wo꞉ a꞉la꞉sio꞉, “Saimon, kalu otalena꞉yo꞉ ge kedab ko꞉lo꞉ ge dasila꞉sa꞉ga꞉, ha꞉g holona timana. I a꞉no꞉ No꞉no꞉n gelo꞉wa iliga꞉fo꞉ ko꞉lo꞉ ge i o꞉lia꞉ ha꞉nakiyo꞉ kele asulakiyo꞉ ha꞉na꞉so꞉bo.”

²¹A꞉la꞉sa꞉labiki da꞉da꞉sa꞉ga꞉yo꞉, Bida e ha꞉ga tina꞉sa꞉ga꞉, imo꞉wo꞉ a꞉la꞉sio꞉, “Gililo꞉ keda꞉i mio꞉wo꞉ ne ko꞉lo꞉ giyo꞉ nelo꞉ amilo꞉ mio꞉we mo꞉wo꞉ o꞉ba?”

²²A꞉la꞉dabu ba꞉dabiki, iliyo꞉ a꞉la꞉sio꞉, “Loma꞉ da꞉la꞉di bo꞉fo꞉lowan kalu Konilius, nio꞉ e iliga꞉tabiki, gelo꞉wa mio꞉. Konilius, e man digalo꞉ kuduha꞉nakiyo꞉, Godeya꞉ mando꞉ kudu ha꞉na꞉sen ko꞉lo꞉ Yu kaluka꞉isale tambo e ko꞉lo꞉ wabuda꞉sen. A꞉la꞉ta꞉ga꞉ Godeya꞉ ma꞉mula꞉ kaluwo꞉ elo꞉wa ya꞉sa꞉ga꞉ sa꞉lakiyo꞉, ‘Bida elo꞉ to sa꞉lab a꞉no꞉ gelo꞉ da꞉ba꞉niki, e mena꞉ki ho꞉lema’ a꞉la꞉sio꞉ ko꞉lo꞉ mio꞉.”

²³A꞉la꞉sa꞉labiki, Bida eyo꞉ iyo꞉ a꞉na alima꞉ki, a usa tilia꞉gane. Iyo꞉ alita꞉ga꞉yo꞉, kea꞉fo amio꞉ Bida o꞉lia꞉ Yoba tilidabu ao i nol o꞉lia꞉ Koniliusa꞉lo꞉ iliga꞉fo꞉ kalu a꞉no꞉lia꞉ iyo꞉ a꞉ma꞉la꞉ ha꞉na꞉ni ane.

²⁴Ho꞉len imiligo꞉ alita꞉ga꞉yo꞉, Sesalia amisa꞉na fa꞉la꞉dowo꞉. Konilius eyo꞉ i a꞉no꞉ mia꞉ib a꞉la꞉bo꞉ asula꞉sa꞉ga꞉, eyo꞉ ene so꞉lo꞉ o꞉lia꞉ ene milileyo꞉ elo꞉wa kegenefo꞉liki yasilo꞉.

²⁵A꞉la꞉fo꞉ko꞉lo꞉ Bida e a usa tinabikiyo꞉, Konilius eyo꞉ Bidayo꞉ ebea꞉sa꞉ga꞉yo꞉, e wabudaki gulalu asi.

²⁶Ko꞉sega Bida eyo꞉ e gasiliakiyo꞉ a꞉la꞉sio꞉, “Dasima, nelo꞉ kalu ge o꞉ngo꞉” a꞉la꞉sio꞉.

²⁷Bida eyo꞉ e o꞉lia꞉ nenela꞉liki, a usa tina꞉ga꞉, kaluka꞉isale kegeo꞉wo꞉ modo꞉ ko꞉lo꞉ sena ba꞉ba꞉.

²⁸Bida eyo꞉ kalu kegeo꞉ o꞉mo꞉wo꞉ a꞉la꞉sio꞉, “Yuwa꞉ ele amio꞉, Yu kaluwa꞉yo꞉ ha꞉la꞉ kalu o꞉lia꞉yo꞉ ualo꞉ gasaya꞉so꞉bo a꞉la꞉saefa꞉. Ele a꞉no꞉ gio꞉ asulo꞉ ko꞉sega niyo꞉ kalu nowo꞉ ‘Godeya꞉ siwa꞉l amio꞉ e mogago꞉’ a꞉la꞉bo꞉ mo꞉sama꞉ki asulakiyo꞉, Godeya꞉yo꞉ nemo꞉ wido꞉.

²⁹A꞉la꞉fo꞉ko꞉lo꞉ giyo꞉ ne mena꞉ki ho꞉idabikiyo꞉, ne mo꞉mo꞉beaki mio꞉ ko꞉lo꞉ gilo꞉ kalu nelo꞉ amio꞉ iliga꞉fo꞉ a꞉no꞉ o꞉bo꞉ sa꞉ma꞉nigo꞉wo꞉?”

³⁰A꞉la꞉sa꞉labiki, Konilius eyo꞉ a꞉ma꞉la꞉bo꞉ a꞉la꞉sio꞉, “A꞉ma꞉ inali amio꞉, ne ofa꞉siyo꞉ ga꞉lo asola dowabikiyo꞉, ne aya siliki, Godemo꞉ dulugu sa꞉la꞉li sen amio꞉, wigibole a꞉naka kalu nowo꞉, helebeso꞉g ho꞉lo꞉, siyo꞉ funa꞉ a꞉la꞉ma꞉no꞉ ko꞉lo꞉ a꞉no꞉ nelo꞉wa fa꞉la꞉dowakiyo꞉, nemo꞉wo꞉ a꞉la꞉sio꞉, ‘Konilius, gilo꞉ Godemo꞉lo꞉ dulugu sio꞉ a꞉no꞉ Godeyo꞉ dabu. A꞉la꞉ta꞉ga꞉ gilo꞉ wa꞉feyo꞉ kalumo꞉lo꞉ boba dimisen a꞉no꞉ E asulaki go꞉.