Aposel 9:2-14

²ra i saringi lena, “Un tumus tar lako kum pas, sur an losi utong una kum rumu na lotu tong o Damaskus.” A mugumugu i tumus tari una kum pas lena, ra in barato lako kum musano ma wardain, ra det mur a Kisapi anun o Iesu, in ker pas det ma in ben det usapat o Jerusalem.

³Ra i wan milau o Damaskus, a labino talapor tagisapat una langit i wanpat kisin, ma i sisio talilis pasi.

⁴Ra i puku pirso una piso, ra i longoro in nalngan ara i watungi tano lena, “Sol, Sol, sur asau ra u ser ban laulau iau?”

⁵Ra o Sol i tingi lena, “Labino, osi ui?” Ra i balu i lena, “Iau o Iesu ra u ser ban laulau iau.

⁶Uniri, un katutur ma un nanpat utiro una tamon Damaskus, ra din inanos ui nama sau ra un pami.”

⁷A taro ra det wan tomo nami, det ngara ra ka det wasiso lar pas, uni det longoro in nalngan ara, ikut ka det tama i.

⁸Ra o Sol i katutur tagitiro upiso, i palos arin matano, ikut ke tama lar pas tu utna mo. Det pam benben tari mukut utiro o Damaskus.

⁹Ma a tulu bung, i pulu kut, ke wangon ma ke inum kai.

¹⁰Ra ara tagun a taro na ususer, a risano o Ananias, i kis tong o Damaskus. A Labino i kabo i una tamtama lena, “Ananias!” Ra i balu i lena, “Labino, iri kut iau.”

¹¹Ra a Labino i watungi tano lena, “Un katutur, ma un nan sur a rumu anun o Judas, una kisapi di watungi nama Tokodos na Kisapi, ma un iting sur o Sol, a te Tasus, kurong i wararing.

¹²Ma una tamtama, o Sol i sa tama tar a musano, a risano o Ananias, i ruk toromi, ra i ubek aru lamano netes uni sur in tamtama melet.”

¹³Ra o Ananias i balu i lena, “Labino, a sa longoro a susut na wasiso una musano ra, ma una kum laulau na utna ra i ser pami una num a taro sapat o Jerusalem.

¹⁴Ra a kum lamlabino tene etabor torom o God det sa mulaot tari, sur in dat det rop ra det lotu una risam. Ra uniri, i sa wanpat nin.”