HECHOS 9:2-14

²Bi dyöjpi car da̱möcja̱ di dyøhtibi hnar carta pa di dɛx pʉ jar jñi̱ni Damasco, di un cʉ pé dda judio cʉ már jmu̱ntzi pʉ. Car carta‑cá̱ di xih cʉ judio pʉ Damasco di möxjʉ car Pablo di zʉh cʉ cja̱hni cʉ mí e̱me̱jʉ car Jesús. Göhtjo cʉ to di döti, hñøjø cja̱ bbɛjña̱, car Pablo di dyɛm pʉ Jerusalén pa di cjoti födi. Car da̱möcja̱ bi dyøhtibi car carta, bbʉ́, cja̱ car Pablo bi dɛtzi, bi bøm pʉ gá ma Damasco.

³Bbʉ má padi jar hñu̱, ya xti zøti pʉ Damasco, bi hna yotitjo hnar tjay, güí hñi̱ jar ji̱tzi, bi hñi̱ti madé car Saulo.

⁴Exque bi dɛjna̱ jöy, cja̱ bi dyøh hnar jña̱ már nzofo. Bi ma̱n car jña̱, i̱na̱: ―¡Saulo! ¡Saulo! ¿Dyoca̱ guí cöbigui?―

⁵Cja̱ bi da̱h car Saulo: ―¿Toquiguɛ? ¿Cja huá guehquiguɛ gú Ocja̱‑guɛ?― Cja̱ bi da̱h car jña̱: ―Guejquigö, dúr Jesús. Guejcö guí cöbigui. Guí jñɛjmi ncja hnar nda̱ni ca i ntsjʉni pa da ma derecho, cja̱ i ti̱jtetjo. Guehquiguɛ guí ʉntsjɛ ca dé grí dyøjtigui tu̱jni.― Bi ncjapʉ gá ma̱n car jña̱.

⁶Bbʉ mí dyøj ya‑cá̱, bi ndo ntzu̱ car Saulo, hasta mí jua̱. Cja̱ bi da̱di: ―¿Ter bɛh ca̱ guí ne gu øti ya bbʉ́, Tzi Jmu̱ Jesús?― Cja̱ car Jesús bi xifi: ―Bböj ya, gui ma nʉ jar jñi̱ni Damasco, cja̱ xtu tsjihqui pʉ ter bɛh ca̱ gui dyøte.―

⁷Guejti cʉ hñøjø cʉ má yojmi car Saulo bi dyødejʉ car jña̱ cja̱ bi hmöpjʉ. Bi ndo ntzu̱jʉ, como jin to gá jiantijʉ.

⁸Nu car Saulo bi bböh bbʉ́, bi zøqui quí dö, bi jani, pe ya jí̱ mí janti. Como jí̱ mí janti pa di hñotsjɛ, bi bbɛntibitjo cár dyɛ cja̱ bi ttzix pʉ Damasco.

⁹Jñu̱jpa gá hmʉh pʉ, jí̱ mí janti cja̱ jí̱ mí tzi.

¹⁰Guejtjo mí bbʉh pʉ Damasco ca hnar hñøjø, mí ju̱ cár tju̱ju̱ múr Ananías. Guegue mí tɛn car evangelio. Ca hnajpa, guegue bi hna cca̱htitjo, ncjahmʉ bi hna ni̱gui pʉ car Jesucristo, cja̱ nucá̱ már nzofo, már ma̱: ―Nuquɛ, Ananías.― Cja̱ guegue bi da̱di: ―¿Te guí cjagui, Tzi Jmu̱ Jesús?―

¹¹Cja̱ car Jesús bi xifi: ―Bböj ya, gui tɛn car hñu̱ ca i tsjifi Derecha, gui ma pʉ jár ngu̱ car hermano Judas, cja̱ gui hñöni, ¿cja jin gui bbʉh pʉ hnar hñøjø i tsjifi ʉr Saulo? ʉr mi̱ngu̱ Tarso‑cá̱. Dyøjma̱ja̱, gui maguɛ pʉ, bú nzofo, como guegue‑cá̱ ya xná mahti ca Ocja̱.

¹²Guegue car Saulo xí hna cca̱jtiquitjo, ncjahmʉ ya xcú cʉti pʉ jabʉ rá bbʉy, xcár ʉx quir dyɛ pa da xoh quí dö cja̱ pé da cca̱hti. Nugö, xtú cjajpi xí hna cca̱jtiquitjo ncjapʉ.― Bi ma̱ ncjapʉ ca Ocja̱.

¹³Bbʉ mí dyøj ya‑cá̱, bi da̱h car Ananías: ―Nuquɛ, Tzi Jmu̱ Jesús, ya xtú øde rá ngu̱ digue car hñøjø‑cá̱. Xí ndo dyøhtibi tu̱jni quir ba̱jtzi cʉ i e̱me̱qui. Xí jio cʉ hermano cʉ rá bbʉh pʉ Jerusalén.

¹⁴Nu cʉ möcja̱ cʉ i mandado pʉ, xpá un cár cargojʉ, eso xpá hñe̱cua car hñøjø‑cá̱, hne̱ da zʉdi göhtjo yʉ i nzohqui quer tzi tju̱ju̱, pa pé da dyɛni du cjoti pʉ Jerusalén.― Bi da̱di ncjapʉ car Ananías.