Aposel 9:11-23

¹¹Ra a Labino i watungi tano lena, “Un katutur, ma un nan sur a rumu anun o Judas, una kisapi di watungi nama Tokodos na Kisapi, ma un iting sur o Sol, a te Tasus, kurong i wararing.

¹²Ma una tamtama, o Sol i sa tama tar a musano, a risano o Ananias, i ruk toromi, ra i ubek aru lamano netes uni sur in tamtama melet.”

¹³Ra o Ananias i balu i lena, “Labino, a sa longoro a susut na wasiso una musano ra, ma una kum laulau na utna ra i ser pami una num a taro sapat o Jerusalem.

¹⁴Ra a kum lamlabino tene etabor torom o God det sa mulaot tari, sur in dat det rop ra det lotu una risam. Ra uniri, i sa wanpat nin.”

¹⁵Ikut a Labino i watungi tano lena, “Un nan kut, uni a sa pilok pasi, sur i anung a tene pinapam. In wasiso puaso una risang torom a taro ra awu sur a taro Israel, torom a kum king, ma torom a taro Israel kai.

¹⁶Ma an inanosi lena, in taramo a susut na mamaut una risang.”

¹⁷Ra o Ananias i wan, ma i ruk una rumu ra o Sol i kis iai. Ra i ubek aru lamano netes uni, ma i watungi lena, “Sol, a tising, a Labino o Iesu, i ra i tur pat torom ui una kisapi ra u wan urin, i ut i tulu ru iau urin sur un tamtama melet, ma sur un bukus nama Tokodos na Nion.”

¹⁸Uniutra a kum utna i elar nama walong na kiripo, i puku pirso gusun arin matano, ra i tamtama melet. I tur ma di baptaiso i.

¹⁹Ra i sa wangon pas, a pinino i dekdek melet. O Sol i kis pas a kabano bung torom a taro na ususer tong o Damaskus.

²⁰Uniutra i turpasi sur in warawai una kum rumu na lotu anun a taro Juda. I warawai un o Iesu lena, i a Nutun o God.

²¹Det rop ra det longoro i, det kisin uni, ma det watungi lena, “Ai! A musano kut ri, ra i umum doko det ra det ser lotu torom o Iesu sapat o Jerusalem. Ra uniri, i wanpat bulung urin, sur in dat pas lako taro ra det ser lotu torom o Iesu, usapat torom a kum lamlabino tene etabor torom o God.”

²²Ma a warawai anun o Sol i dekdek ra i watung a kum utna ra i ulingmulus pasi lena, o Iesu i ut a Karisito. Ma a taro Juda ra det kis tiro o Damaskus det nuknuk doko una nun a wasiso, ma ka det pet lar pasi sur det in balu i.

²³Ra i sa rop a susut na bung, a taro Juda det epak sur det in um doko o Sol.