Aposel 7:16-42

¹⁶Age Josef Jekobca dewenela ganac Sekem ono ehi nui Ebraham heel eu Hemo sihul agenadec qaig silwana fajen euna heel cisalein,” aden.

¹⁷“Saen Anut uqa Ebraham je hahun madon eu wele dodoldodon egena sihul ha Isip hatuna ono fulusdon.

¹⁸Saen euna king oso uqa Josefnu qee doc Isip ono calimei hatu eu cofdon.

¹⁹Uqa egena sihul uhuladimei uqa qisaadi maadeceb age agena mel sim basoloig eundec cal mecnu ehadi nui maha gemo culadoloig.

²⁰Saen euna Moses uqa cali hon. Uqa mel galeca bahic, uqa jagel cijed memegna jobon bilen.

²¹Odocob saen uqa jobondec ehi nui fil mudein euna king ateg uqa umei melah bahic cinigwe cofdodon ben men.

²²Uqa Isip agena kobol docca iwaldodogin ben men, eu uqana je madec odocca eu gagadic men,” aden.

²³“Saen Moses uqana cabi gel 40 odi uqa cotugul Isrel eu ono li feciadigiannu cisdon.

²⁴Ono nuimei uqa Isipdec dana oso Isreldec oso qoqon fimei eunu uqa li Isreldec wadacdocnu cesuldumei Isipdec qocob cal men.

²⁵Uqa Isrel dana eu age Anut besiadigiannu cabi uten ec odi doqagan ec cisdon qa eu age odi qee cisdoloin.

²⁶Deel osona uqa Isreldec dana lecis cacadesin mecialimei uqa cahacalimei tanawaligiannu odon. Odimei maalen, ‘Se, dana lecis ale Isreldec himec. Odi eetanu cadesina?’ alen.

²⁷Euqa oso uqa cotig wadon eu Moses gesac sundumei madon: ‘In hina ege cofgecca gesilgecca mihen?’ don. Uqa sisildon,

²⁸‘Hina cum Isipdec qagadoganwe odi ijaha qagateganfo?’ don.

²⁹Moses je eu dah mimei uqa Isipdec busali nui Midia mahana ono bilen. Ono uqa aideg mel manahal lecis basalen,” aden.

³⁰“Cabi gel 40 hedocob Tibudna ensel na nag oso ja cijec belicanna tatawen fen, wadauna Sainai aluh cemenug.

³¹Moses eu odi fimei tumatumaen. Odimei cisdudu fi cuhadugia eunu na nag eu cemenugca len. Euqa dodoldodon uqa Tibud jejeg dah men.

³²‘Ija hina jajaninel agena Anut, ija Ebraham, Aisak, Jekobca agena Anut,’ en. Odocob Moses qelelimei jejeg cali honna isec feciecnu culen.

³³Odocob Tibud Moses madon: ‘Cudun hina tawaga eu maha gun. Eunu hina jaim tacec eu huluga.

³⁴Isip dana age ijana dana cajaca me qee odadegina eu ija figina. Ija agena sogoec eu dah migina eunu ija besadigennu niga. Qila, ija hina sulhecemin Isip hatuna nuegan,’ don,” aden.

³⁵“Moses i Isrel dana age uqanu cuculeig sisildoin, ‘In hina ege cofgecca gesiligecca mihen?’ doin. Euqa Anut uqa ensel na nag oso ja cijec belicanna tatawen fen uqa ebenna besiadimei cofadigiannu suldon.

³⁶Uqa Isrel dana Isipdec ehadi nuen. Uqa kobolkobol gagadic odocca Isip onoca macas golcana odon. Odocob cabi gel 40 leceb wadauna ha odon.

³⁷Moses i uqa Isrel dana maaden: ‘Anut ija ageca sulteceb homwe eu odi uqa je hahun madec dana oso hibna age gemonadec ageca suldocob hugian,’ aden.

³⁸Moses uqa Isrel tamanecca wadauna ono bilein, saen euna uqa ege jajanigeilca bibilegin ensel uqa Sainai aluhna ono je madon eu uqa cebac bilec je igecnu uten,” aden.

³⁹“Euqa ege jajanigeil Mosesna je qee toodoloin. Uqa gesac sundodoig age haun Isip ceseloqagannu cisdoin.

⁴⁰Eunu age Eron madoin: ‘Ege kadan tibud mudadigecem ege jic aqunigeiga. Ege dana Moses egina uqa Isipdec ehigi ahon eu ana nuia qee doqona,’ doin.

⁴¹Eunu age uhulec kadan tibud eu bulmakau nag ihicon qu mudein. Uqa ihandoin. Odimeig sab ben cicileig uhulec kadan tibud agedodoc mudeinnu celeboein.

⁴²Eunu Anut age hibemaden. Odimei Anutna je hahun madec dana agena jaqec jena taweia eu madenawe: ‘O Isrel dana caja! Age cabi gel 40 wadauna cocoboig dool aqimeig ihanoloig saen euna age ijanu ihantoloig ec cisdoginafo? Age Molekna jo talahca Refan tibud uqana malaqa ihiconca gahialein. Eu uhulec kadan tibud himec age eunu cuha foqagannu mudein. Eunu ija age Babilon hibilohu isec suladecemin beli biluqagan,’ madenawe odi Anut uqa malaqa sao ohis binan suluqagannu ahawaaden,” aden.