Aposel 4:6-34

⁶Det tomo nam o Anas, a mugumugu na tene etabor torom o God, ma a kum kukunu ri det: o Kaiapas, o Jon, o Aleksanda, ma ara taro kai.

⁷Di ben pas o Pita ma o Jon, ra der tur umatandet ma det ting der lena, “Osi na ngas na dekdek ra mur pam a utna ri nami? Ma a risan osi ra mur pami nami?”

⁸O Pita i bukus nama Tokodos na Nion, ra i watungi tandet lena, “Mot a kum mugumugu anun a taro ma a taro na kiwung kai,

⁹uniri mot ting mir una wakak na pinapam ra mir pami una musano ra ke ser wan ma di ulangolango petlan pasi.

¹⁰Mot ma a taro Juda rop, mot in tasmani lena, a musano ri ra i tur numugu tamot, di ulangolango pasi nama risan o Iesu Karisito a te Nasaret, i ra mot sak wat tari unin nanai kutus, ma o God i ukatutur melet pasi gusun a minat.

¹¹I ‘A wat ra mot a kum tene pam rumu mot lakro ru tari, i ut ra, i wanpat a wakak na wat ra i udekdek a rumu.’

¹²Katutaio gisen in ulaun dat, ma katu risan taio kai taginin una rakrakon bual, ra o God i pitar tari torom dat a taro, sur din ulaun dat nami.”

¹³Det tasmani lena, o Pita ma o Jon aru musano oros kut, ma ka der ususer pas un tu labino wortowo. Ma det kisin doko un der ra der wasiso ma ka der ngara. Ra det tasmani lena numugu detul ser imurmur tomo ut nam o Iesu.

¹⁴Ikut det tama a musano ra di ulangolango pasi, i tur tomo nam der, ra ka det pet lar pasi mo sur det in balu der.

¹⁵Det tulu gisen ru detul munung gusun a kiwung, ra det wasiso tomo pas, ma det watungi lena,

¹⁶“Asau dat in pami una ru musano ri? Uni der sa pam ru ara labino utna na ukisin, ma i sa talapor torom det rop ra det kis nin o Jerusalem. Dat in ipul pepetlai mo?

¹⁷Dat in turbat dekdek der, sur gong melet mo der wasiso torom taio nama risan o Iesu, sako a wasiso ri in nan kakaka torom a taro rop.”

¹⁸Numur det kabo melet pas der, ma det turbat der sur gong melet mo der wasiso ma der ususer lako taro nama risan o Iesu.

¹⁹Ikut o Pita ma o Jon der balu det lena, “Pepetlai, i tokodos umatan o God sur mir in mur anumot a wasiso, ma a wasiso anun o God gong? Mot ut mot in tama i.

²⁰Ikut mir, ka mir in mana lar pas nama wasiso un asau ra met sa tama tari, ma met sa longoro tari.”

²¹Ra det sa turbat dekdek tar der, det palos ru der. Ka det sio lar pas tu utna ra det in um der uni, uni a taro rop det watung ulabo pas o God una utna na ukisin ra der sa pam tari.

²²Uni a musano, ra di pam a utna na ukisin uni ra i langolango, anun a kilalo i labo taun a wat na noino.

²³Ra di sa palos ru o Pita ma o Jon, der milet melet torom a kum paspasan der, ra der inanos det una kum utna rop ra a kum lamlabino tene etabor torom o God ma a kum mugumugu det sa watung tari tander.

²⁴Ra det longoro i, det wararing tomo torom o God lena, “Labino, u ukis a bakut, a rakrakon bual, a tasi, ma a kum utna rop ubalandetul.

²⁵Una Tokodos na Nion, u pitar a wasiso torom a tubumet o Dewid, anum a tultul. Ra o Dewid i watungi lena, ‘Asau a kibino ra a taro, ra awu sur a taro Israel det kankan doko? Ma sur asau det epak sur det in pam a sakino? Ikut anundet a epak i utna oros kut.

²⁶A kum king taginin una rakrakon bual det tur na inaim, ma a kum mugumugu det wan tomo, sur det in ban laulau a Labino ma anun a Mesaia, i ra i sa pilok pasi.’

²⁷A lingmulus ra o Erod ma o Pontias Pailat, ma a taro ra awu sur a taro Israel, ma a taro Israel kai, det wan tomo una tamon ri sur det in ban laulau o Iesu, anum a Tasur na Tultul, ra u sa pilok pasi.

²⁸Ra det pami lenra, det pam sot pas a kum utna ra numugu u sa waninar tari una dekdekim ma una num a nemnem sur in nanpat.

²⁹Labino, un nuk pas anundet a kum dekdek na wasiso, ma un warut met anum a kum tultul sur gong met ngara ra met in wasiso puaso nama num a wasiso.

³⁰Un warut met nama dekdekim sur a kum misait det in langolango, ma a kum utna na ukisin ma a kum ukinalong det in nanpat una risan o Iesu, anum a Tasur na Tultul.”

³¹Ra det sa wararing pas, a rumu ra det kis tomo uni i tugunu, ma det rop det bukus nama Tokodos na Nion, ma det wasiso nama wasiso anun o God, ma ka det ngara.

³²A kum tene nurnur rop, i takai kut a nuknukin det ma a balandet, ma kataio tagun det i watung tu utna sur anunu kut. Det ubek tomo a kum utna sur anundet rop.

³³A kum aposel det wasiso nama dekdek, una nilaun melet anun a Labino o Iesu gusun a minat, ra det sa tama tari. Ra a labino marmaris anun o God i kis un det rop.

³⁴Kataio tagun det i sibo sur tu utna, uni det ra anundet a kum du piso ma det kai ra anundet a kum rumu det siuru pasi, ra a mani taguni,