Atos 4:6-34

⁶Târâlâ myani Anás. Kurâdo eynynâ Deus agâ aguewâni modo iwymâry kuru myani mâkâ. Ipemugudo tarâlâ lâpylâ myani, Caifás, João, Alexandre, eagonro modo warâ.

⁷Aituo myani sodadu domodoram aguelymo: — Pedro, João warâ enetaungâ xarâ — kelymo. Aituo myani ese idâlymo, nhadylymo. Saintuomo myani pymâdo tânadoram ingâsedylymo. Tânadoram idâduomo myani nhapâiguelymo: — Ânguy unâry wâgâka keankâ uguondo adakobâdânrybyry kua mânhedylymo? Ânguy eon-honrugueka keankâ koendâ adakobâdoem amânhedylymo? — kelymo.

⁸Deus Ispiritury ton-hondâni awylygue tyanepa kehoem eyanmo Pedro wakely: — Idaenkulymo wao, pymâ domodo.

⁹Mâuntudyze âmaemo merâ uguondo adakobâdânrybyry xina kua nhetobyry, âdara xina kua nhetobyry awyly warâ.

¹⁰Egatuze urâ, mâuntuhomoem, idânârâ judeu domodo nhutuhoem lâpylâ warâ. Uguondo kua idyly keankâ, Jesus Cristo Nazaré donro eon-honrugue, mâkâ kruz wâgâ mâyâympymo, Deus kurâem nhetondyby eon-honruguelâ.

¹¹Jesus izepa keankâ âmaemo. Tâlâ âwâgâmo Deus aguehobyry iweniby. Warâ aguely: “Tâlâ myani tuhu imeâgâkeba, âtâ itâdo. Idânârâ itâdaynrim modo mârâ tuhu tâensemo, mârâgue âtâ tintâdyzebamo olâ. Deus xurâem olâ mârâ tuhu tywyneim kuru!” warâ iwenibyem awyly. Âtâ itâni modo tuhu âtâ saunâto kuru izepa atomobyry ara ise mâkâ imakerinmo izepa mawylymo.

¹²Jesus kulelâ kâmakerim, eagonro lâpeba. Ânguy eagonro nigonotaymba Deus kâmakerin-em — kely myani Pedro.

¹³Tyanepa kehoem Pedro, João warâ aguelymo tindatuo myani pymâ tynruneim modo toenzepa kehoem âsewânilymo. Tutuzemo mawânkâ myani âsenomedâdyby keba, âdy keba warâ awylymo; tonomegueim agueho ara kehoem agueduomo olâ Jesus eynynonrobyry asaemo — kelymo.

¹⁴Eagâmolâ myani mâkâ uguondo adakobâdânrybyry epagu. Awylygue myani Pedro, João warâ wâgâ âdakepa awylymo.

¹⁵Aituo myani Pedro, João, uguondo kua nhetybymoram warâ aguelymo: — Âxiguewâdaungâ wao tarâpa — kelymo. Âxiguebygueduomo myani akaemo pymâ domodo âjigue aguelymo:

¹⁶— Âdakiendylyka ise akaemo azagâ uguondo modo? Idânârâ Jerusalémdâ tâjikeim modo tutuzemo, adyesenry anhetomobyry, mâkâ uguondo kua nhetomobyry. “Adakobâdânrybyry kua nietaymbamo” kykely-ro watay, kurâdo kyeileze.

¹⁷Kyjigâsedon-nemo wao, “Mâkâ uguondo kua ityby wâgâ, Jesus wâgâ warâ ânguyram adâkezeba itaungâ” kykehoem. “Jesus wâgâ amyguezesedylymo-ro watay, toenzepa kehoem inagazenehonzemo xina” kykely ise eyanmo — kelymo myani.

¹⁸Aituo myani akaemo azagâ ingâsenehonlymo, aguelymo: — Jesus xunârybyry aguely imowâdaungâ. Ânguyram iwâgâ adâkezeba itaungâ. Âdaunloenlâ Jesus xunârybyrygue ânguy kâzenomedâdondaundâ — kelymo myani.

¹⁹Agueduomo Pedro, João warâ aguelymo lâpylâ: — Deuslâ keankâ, “Jesus xunâry egatuwâdaunda” kerim. Âmaemo pylâ “Kâzegatuwâdaundâ” kerin-ro. Ânguyka ise xina nheinwânkyly kuru? Âmaemo? Deus?

²⁰Jesus aidyly xina nedâ. Nhenomedâdo xina nidadâ warâ. Awylygue ise iwâgâ adâkely xina nimopa awyly — kelymo.

²¹Arâ agueduomo myani pymâ domodo eyanmo aguely: — Tarâpa itaungâ. Jesus xunâry ânguyram kâzegatuondaundâ olâ-ro warâ. Iwâgâ amyguezesedylymo-ro watay, toenzepa kehoem inagazenehonzemo enra xina — kelymo. Warâ olâ myani kurâ domodo mârâ âtâ anano modo aguelymo: — Koendonro awâkâ Deus. Ton-honru nudu akaemo azagâram, mâkâ adakobâdânrybyry kua nhetomoem — kelymo. Agueduomo myani pymâ domodo akaemo azagâ tienagazenehon-ho nutuba idylymo. Aituo myani aguelymo: — Kienagazenehonlymo-ro watay, kurâdo kagâ iewiâpadaynzemo — kelymo.

²²Quarenta anos takaze myani mâkâ uguondo Deus eon-honrugue kua ityby.

²³Âzetagueoybyem myani Pedro, João warâ idâlymo Jesus einwânni modoram. Idânârâ kurâdo eynynâ Deus agâ aguewâni modo iwymârydo, judeu domodo iwymârydo warâ aguehomobyry tâgatuzemo myani.

²⁴Nhegatuybymo tindatuo myani idânârâ kehoem Deus agâ aguelymo: — Pymâlâ âmâ, Deus, idânârâ xugunipyrylâ, kau, onro, parutabâ, paru warâ. Idânârâ tâlânro modo âmâlâ xuguni.

²⁵Âispirituryguelâ myakâwândy imary Davi xirâ aguely inwenily: “Judeu keba modo tyewiâpazemo; judeu domodo inakanhe âedyly wâgâ tyangahu oday tunâgue warâ.

²⁶Idânârâ pymâdo on-hoam isemo. Kywymâry Deus agâ âseguebyze kezemo. Deus Ingonokyly idueryem isemo warâ” kely myakâwândy Davi inwenily.

²⁷— Davi aguehobyry ara kehoem keankâ aidyly. Herodes, Pôncio Pilatos warâ, judeu domodo agâ, judeu keba modo agâ warâ nâtâdyguywâdaundâmo, tarâ Jerusalémdâ âmery Jesus tienagazedomoem. Inakanhe aityby keba lelâlâ wâne keankâ; alâ olâ keankâ Mâingonotyby nhenagazenehonlymo.

²⁸Tutuzelâ makynre arâ ainiem awylymo, “Warâ ise aidyly” myguehobyrylâ awylygue. Idânârâ awârâ modo aidyly on-honruguelâ, arâ ize mawylyguelâ warâ.

²⁹— Pabai, tutuzelâ âmâ, pymâ domodoram xina âjiewiâseolymo. Xina tienagazedyze akaemo. Imary tawylygue xina on-honru nhekadyly, tyanepa xina âwâgâ aguezesedoem.

³⁰On-honru xinaram xudugâ, tâwânuneim modo kua xina nhetoem, adyesenry modo kehoem xina anhetoem warâ, xina agâlâ mawyly xutuhoem. Warâ xina imarydo aiekâ, Jesus âdykâ inakanhe ityby keba eon-honrugue xina aitoem — kelymo myani Deusram.

³¹Deus agâ adâkely nhewanikebygueduomo myani mârâ âtâ âtâdyguyhomo âzekânily; Deus Ispiritury eyanmo âewyly, eon-hondâzemo. Aituo myani idânârâ kurâdo eon-honru âduduoly, Jesus xunâry egatuze tyanepa itomoem.

³²Koendâ kehoem myani idânârâ Jesus einwânni modo âzetaynlymo. Aguimo wâne, tokaleom aramo lelâ olâ myani. Turâem lelâ waypamo myani, tâlâ tato modo ipaom modoram nhepâdylymo.

³³— Pymâ Jesus nigue wâne. Iwerâ olâ kurâem itondybyem. Kurâem itondybyem awyly ume xina nedâ — kezesemolâ myani. Deus toenzepa eon-honrumo tuduze myani, tunâry nhegatuhomoem. Koendâ lelâ myani akaemo Jesus einwânnipyry modo agâ.

³⁴Tâty ioday tato vende iemâmomy. Tonroguneim modo tonroru vende ietaunmâmomy warâ. Ebyrypyry myani Jesus tunâry egaturin-em induakeyby modoram nhudulymo.