Aposel 21:5-25

⁵Ikut ra a wonom mawit na bung i sa rop, met wan melet, ra a taro na ususer rop det tulu tar met unago utasi, det tomo nam anundet a kum ino ma a kum nutnutun det. Ra met sa wanpat nago utasi, met kis butkeke una usalin, ma met wararing.

⁶Numur met wasiso na itula pas, ra met kas una sip, ra det, det milet melet sur anundet a kum rumu.

⁷Met wan tagitong o Tair ra met sot tong o Potolemais, ra met etorom pas nam det ra det tar tistisino una nurnur, ra met kis pas ara bung tomo nam det.

⁸Una bung numur, met wan melet, ra met wanpat tong o Sisaria, ma met kis una rumu anun o Pilip, a tene warawai nama Wakak na Wasiso, ara tagun a wonom mawit det ra a kum aposel det pilok pas det.

⁹O Pilip a wat na nutnutunu, a wat na toraro, ra det ser wasiso na poropet.

¹⁰Ra met sa kis tiro o Sisaria a susut na bung, ara poropet, a risano o Agabus, i wanpat. I wan tagisapat una papor Judia.

¹¹I wan torom met, ra i rakon pas a let anun o Pol, ra i ker pas aru kikino ma aru lamano ut nami, ma i watungi lena, “A Tokodos na Nion i watungi lena, ‘A taro Juda sapat o Jerusalem det in ker a musano ra anun a let ri, lenutri a pami. Ma det in pitar tari una laman a taro ra awu sur a taro Juda.’”

¹²Ra met longoro a wasiso ri, met nama taro tagun a tamon ra, met turbat o Pol sur gong i wan usapat o Jerusalem.

¹³Ikut o Pol i balu met lena, “Ilai ra mot tangis, ma mot utupunuk iau? A sa pitar tar iau sur det in ker iau ma din um doko iau utkai sapat o Jerusalem, kibino una risan a Labino o Iesu.”

¹⁴Ra met lagano turturbat tari, met mana mukut, ma met watungi lena, “I wakak sur din pam sot pas a nemnem anun a Labino.”

¹⁵Ra numur, met waninar pas anumet a kum ututna, ra met wan usapat o Jerusalem.

¹⁶Met wan tomo nama ramano taro na ususer tagitong o Sisaria. Det tulu tar met torom ara musano, a risano o Manason, a te Saipras, sur met in kis toromi. I ara tagun a kum mugano taro na ususer.

¹⁷Met wanpat sapat o Jerusalem, ra det ra met tar tistisino una nurnur det ben pas met nama gasgas.

¹⁸Una bung numur, met nam o Pol, met ruk torom o Jems. Ma a kum mugumugu rop anun a taro na lotu kai kura.

¹⁹O Pol i wasiso na ugasgas pas torom det, ra i inanos wakak det mo nama sau rop ra o God i sa pam tari una pinapam anun o Pol torom det ra awu sur a taro Juda.

²⁰Ra det longoro i, det watung ulabo pas o God. Ra numur det watungi tan o Pol lena, “Tisimet, u tasmani lena a susut na arip tandat a taro Juda, det sa nurnur, ra det rop det dekdek sur det in mur a Warkurai anun o Moses.

²¹Det sa longoro a wasiso un ui lena, u ser ususer a taro Juda rop ra det kis nisan a taro ra awu sur a taro Juda, sur gong det mur a Warkurai anun o Moses. Det longoro i lena, u inanos det sur gong det tok talilis a pinin a kum nutnutun det, ma gong det mur a kum petutna anun a taro Juda.

²²Ra asau mo dat in pami, ra det in longoro i lena, u sa wanpat urin?

²³Un pam a utna ri met in watungi tam: A wat na musano tagun met, det sa liliman taru torom o God.

²⁴Un nan tomo nam det, ma mot in utalapor mot elar nama Warkurai, ma un kul a kum utna na etabor ra det in etabor nami. Ra numur din kumur rop ru a iwu na lorindet. Ra un pami lenri, a taro rop det in tasmani lena, a kum wasiso ra det sa longoro tari un ui, ke lingmulus, ma ui kai u ser muri ut a Warkurai anun o Moses.

²⁵Un ra bung dat sa tumus tar a buk torom a kum tene nurnur tagun det ra awu sur a taro Juda, lenri: Gong det wan tu utna ra di sa etabor taru nami torom a kum torotoro na god. Gong det wan tu utna ra ka di gos wakak a gap gusuni, ma tu wewegua ra di pos doko i kut, ra a gap kura utmakai uni. Ma gong det pam a kum petutna na pamuk.”