Aisaya 11:3-10

³Touna, Yawe God kabisisireninama ininuwamiise. Bi sawara matanama yakitakitadi bo tainanama yawaiwaiyanedi na gegha initupawamiwamiredina.

⁴Touna wawaya moyamoyakidi keda rotomanine initupawamiwamiredi, bi wawaya noganogadi na noghota miisedi inabera kiiravidiye. Yana sisiya na ware kii kakokakonama tanawa yarurouvina naboni, da wawaya kawakeekeedi yikasunughana.

⁵Wiitupawamiwamira rotomanidi na ware kikiru borine iyiruvivireni na naboni, bi wiisuwona na ware sineyetutura geyageyane iyiruvivireni.

⁶Noko raghanine, na ribiribi geananamanidi da ananamanidi na nuwaruririye sinamake patapata, noko biidi garagara daghasi na sip wotuwotudi teya sinimakeyana, lepord na gout wotuwotudi teya sinikeneyana, laiyon na kau wotuwotudi teya sinakam patapata bi ededa gisigisidi sinageghomiiri da sinakoyayidi.

⁷Kau da Beya sinakam patapata, bi natunatudi na nuwaruririye sinikena reereghana. Laiyon na rei sinakam ware kau sakamkamna naboni.

⁸Pepeya, mota ere tuwamorobidi kadi bonagha riridiye sinirekwa; bi ededa gisigisidi bada mota googonidi kadi nighuve imadi sinatoura bi gesinakanidina.

⁹Toudi gesinivisi sinayouna bo gesiniyogha kabivivirana da bero sinayouna yagu koya kabikabikuwayina debanena, basuna wawaya iiyawogha Yawe God sakovi na kubura tupana sinibonuvi ware rarima yegii ivibonuvina naboni.

¹⁰Noko raghanine na kiiwawo wouna Jese nosinosina kamodima na ware matakira naboni wawaya kiiravidiye kubura debane. Toudi sinariyeni touna biidi yana kwanatu kiikiiwawone bi gawarina meme yamakamake na kabikabikarawayina.