Aesea 11:3-10

³Asuv houlu enek hesi kei mok vahouhou min Ahi ka helong kati. En avong ten kot, kei houmoni hemal en meatin keil. Hermusiltei asas koa kei lesi mal en meten, vuo asas koa longe en ralingen.

⁴Vuo. Navong heles usite onen meatin keil en out netan, houmoni housil sakien ten maluen enges. Anatin, houmoni hemal en koakeil tounah one tovuol ka hekataun koakeil arkeihtei. Ral min selusien onen, helei rahit en usite onen meatin vasi keil ten out netan. Anatin, hetal min selusien takeih onen, heta koteh moulien onen koakeil amum kalkali.

⁵Vatte ten losilkatien onen hehi maluen ka anatinien.

⁶En hen, tounah vasi keil koa amoul en out netan ito en tomat. Huli rendan keil ito out hetas en tomat hetal min titi sipsip keil. Taegar keil emun imatil out hetas hetal min nani keil koa avi havivi. Ka laeon keil ito hetal min titan buluk keil koa ave musising ka irkantei keil, ka keil imah revi keke titiali keil enges akilea avalamun keil.

⁷Buluk keil ianian ruai hetal min bear keil, ka titae keil imatil ruai en tomat. Ka laeon keil ian oumunai hesuval buluk keil.

⁸Titiali keil koa akea veah ilea ipilei vesesal en out koa tetal tisa keil amul ien. Anatin, keil itokol tetal keil, ka tounah sakras vamai vapurun keil.

⁹En out vasi keil koa mul rahit Hou Saeon koa vi vatihou votut onen Ahi, tounah tovuol hel ien koa kilea vapurun etai meatin vuo voum vatisa. Ka ileilien usil Iahova hemai hesien revi out netan, hesuval atas mul sien revi vulin.

¹⁰Avong hemai keke asuv houlu hau tai koa hekistal en vatiamal onen Deved hemai helomal. Meatin keil vasi ten out netan koa amul soutin iha ilesi ka usili. Anatin, keil imai veni en out kati onen koa hehi moreite vis hehi moreite mok.”