Acts 5:3-34

³Me ga’ar Peter ngak, “Ananias, mang ni kam pagem ngak Satan kemang ir e ke gagiyegnag lanin’um ke muruwliyem kam lifith l’ugunam ngak fare Kan ni Thothup ni bochan e kam cha’riy bang fare salpiy ni yag ngom ni puluwon fare gi binaw?

⁴Dawor mpi’ e binaw rom ni chuway’ me gur e mmil fan ngom, ma fa’ani mpi’ ni chuway’ nge yib e salpiy riy ma ka gur e fanam. Ere mangfan ni mturguy u lanin’um ni ngam ngongliy e binir e ngongol? Gathi girdi’ e kam lifith l’ugunam ngak, ya kam lifith l’ugunam ngak Got!”

⁵Nap’an ni yigi rung’ag Ananias e re bugithin nem me thig nga but’ nike yim’; ma urngin e pi’in nrung’ag murung’agen e ren’em e yib e marus ngorad.

⁶Me yib e pi’in pagel ngar bachiyed e mad ngak, miyad fek ngranod ra k’eyged.

⁷Gonap’an e dalip e awa nga tomuren me yib e bpin rok, machane de nang e n’en ni kan rin’.

⁸Me ga’ar Peter ngak, “Mog, ireray urngin e salpiy ni yag ngomew figirngim ni puluwon fa gi binaw romew?” Me fulweg ni ga’ar, “Er rogon, kemus urngin i er.”

⁹Me ga’ar Peter ngak, “Mangfan ni mdugliyew figirngim ni ngam sikeng nigew fare Kan Nthothup rok Somol? Fapi pumo’on ni kar k’eyged figirngim e kar tawgad nga langan e mab e chiney, ma ku bay ra feked gur nga waen!”

¹⁰Ka chingiyal’ nem me thig nga but’ u to’oben ay Peter me yim’. Me yib fapi pagel miyad guy nike yim’, miyad fek nga waen ngar k’eyged nga to’oben e pumo’on rok.

¹¹Ma urngin girdi’en e galesiya nge urngin e pi’in nrung’aged murung’agen e re bugithin ney ni yib e marus ngorad nib gel.

¹²Bo’or e maang’ang nge bogi n’en ni un ngat ngay ni i ngongliy e pi apostel u fithik’ e girdi’. Me mu’ulung urngin e pi’in ke mich Jesus u wun’rad ngabang u Tempel ni kan tunguy fithingan ni Beranda rok Solomon.

¹³Ma dariy be’ ni gathi ir girdi’en e re ulung nem ni math’ daguwen rok ni nge un ngorad, ni yugu aram rogon ni yad bfel’ u l’ugun e girdi’.

¹⁴Machane i yo’or e girdi’ ni i mun ko re ulung nem — ni yu ulung i pumo’on nge ppin ni pi’in ke mich Somol u wun’rad.

¹⁵Bochan e pin’en ni i ngongliy e pi apostel ma aram min gachowriy e pi’in nib m’ar ngalan e yu pa’ i kanawo’ ngan tayrad nga daken e bet nge chob ni fan e nge yan Peter u rom ma gomanga n’en mi yigi aw fon ngak boch i yad.

¹⁶Me yib e girdi’ ni yu ulung ko pi binaw nib liyeg yu Jerusalem, ni kar feked e liliy rorad nge pi’in ke ying e mo’onyan’ ngorad; ma yad gubin nni gol nagrad.

¹⁷Ma aram me ri awan’ fare Prist ni Th’abi Ga’ nge urngin e pi’in yad nga baraba’ ni girdi’en e ulung ko Sadduse u rom ngak e pi apostel; ma aram miyad turguy ni ngar rin’ed ban’en ngorad.

¹⁸Miyad kol e pi apostel ngron’ed yad ngalan e kalbus nib milfan ngak e am.

¹⁹Machane re neap’ i n’em e yib ba engel rok Somol i bing e pi garog ko kalbus, me pow’iy fapi apostel nga wuru’ e kalbus, me ga’ar ngorad,

²⁰“Mmarod mu sak’iygad ngalan e Tempel ngam weliyed ngak e girdi’ urngin ban’en ni murung’agen e biney e pangin nib be’ech.”

²¹Me fol e pi apostel riy, ma nap’an ni be puf e woch miyad yan ngalan e Tempel ngar tababgad ko machib. Ma fare Prist ni Th’abi Ga’ nge pi’in yad nga baraba’ e ra ulunguyed urngin e pi’in pi’ilal rok piyu Israel ni ngar mu’ulunggad ngar puruy’gad; miyad pi’ e thin nge yan nga kalbus ni ngan fek fapi apostel i yib nga p’eowcherad.

²²Machane fa’ani taw fa pi’in ni knol’oegrad, ma de moy fapi apostel u kalbus; ma aram miyad sul ngar weliyed ngalan e mu’ulung ni lungurad,

²³“Fa’an gu tawgad nga kalbus ma gamad pir’eg ni kan loknag nib nemow ma urngin e matanag ni yad be matnagiy fapi garog; machane fa’an gu binged fapi garog ma da gu pir’eged be’ u lan fare kalbus!”

²⁴Ma fa’ani rung’ag e en ni ir e mmil fan e pi’in nmatnagen e Tempel ngak nge pi tolang ko prist, mu ur fithed yad ko n’en nike rin’ fapi apostel.

²⁵Ma aram me yib be’ nib mo’on ngalan fare senggil me ga’ar ngorad, “Mu telmed! Fapi pumo’on ni mon’ed yad nga kalbus e yad ba sak’iy u lan e Tempel ni yad be machibnag e girdi’!”

²⁶Ma aram me yan fa’anem ni ir e bay matnagen e Tempel u tan pa’ ni yad e tirok’ e girdi’ ngranod ra fulweged fapi apostel. Machane dar gel niged yad ngorad, ni bochan e yad be rus nrichey me malang nagrad e girdi’.

²⁷Miyad fek fapi apostel i yib ngalan fare senggil marbad ra sak’iy niged yad nga p’eowchen fare ulung, me fithrad fare Prist ni Th’abi Ga’ ni ga’ar,

²⁸“Kug ted chiylen ngomed ndab kum machib niged fithingan nge murung’agen e re mo’on nem; machane amuguyed aray e n’en ni kam rin’ed! Kam wereged e tin ni gimed be machibnag u gubin yang u Jerusalem, ma gimed ba’adag ni ngan leamnag ni gamad e gu warod u murung’agen ngan li’ ngem’!”

²⁹Me fulweg Peter nge fa tin kabay e apostel ni lungurad, “Thingar gu folgad rok Got ko bin ni nggu folgad rok e girdi’.

³⁰Fare Got rok e pi chitamangidad e faseg Jesus ko yam’ u tomuren ni kam thanged e fan rok, ni fa’ani mrichibiyed nga ba kuruth.

³¹Mi Got e ke tolangnag ke tay nga ba’ ni mat’aw rok ni ir e nge yog e thin me ir e ngi i thapeg e girdi’ ngak Got, ma nge pi’ e tayim ngak e girdi’ nu Israel nu lan e re tayim nem e ngar pi’ed keru’rad ko kireb ni yad be rin’ me n’ag Got fan e denen rorad.

³²Gamad e mich ko pin’ey — gamad nge fare Kan Nthothup, ni ir e tow’ath rok Got ngak e pi’in yad be fol rok Got.”

³³Ma fa’ani rung’ag girdi’en fare ulung e re bugithin ney me ri gel e damumuw ngorad, miyad duwgiliy ni ngan thang e pogofan rok fapi apostel.

³⁴Machane bay bagayad, ni ir reb e Farise ni Gamaliel fithingan, ni reb e tamchib ko Motochiyel nri urngin e girdi’ mma tayfan, ni sak’iy ngalang u lan fare ulung. Me yog ni ngan fek fapi apostel nga waen,