Hechos 5:3-34

³Ijkuakó Pedro okili: —Ananías, ¿tleka otikkawili n satanás makimoaxkati moyolo, iwa mamitstokti xikkajkayawa n Espíritu Santo, iwa otikchikowi n tomi non omitsmakakeh por motlal?

⁴¿Mach amo okatka moaxka n tlali? Iwa ijkuak yotiknemák, ¿amo noiwa okatka moaxka n tomi? ¿Tleka kiné otikkawili moyolo matlakajkayawa? Amo otikinkajkaya n tlakah, yej otiknekia tikkajkayawas Dios.

⁵Ijkuak Ananías otlanki okinkak ninteh tlájtolteh, omikki. Iwa nochteh akimeh okimatkeh tlan otlamochi, tlawel omomojtijkeh.

⁶Ijkuakó owalajkeh sikimeh telpokameh, okimemelojkeh n miketl iwa okitookatoh.

⁷Kemi eyi ora satepa, okalakiko isiwa n Ananías, mach okimatia tlan otlamochijka.

⁸Ijkuakó Pedro okitlajtlani: —Techili, ¿Nomejwah ononkinamakakeh n tlali, achó kemi nonkijtoah? N siwatl otlanankili: —Milák, achó ipati.

⁹Pedro okili: —¿Tleka ononmotlatlalwijkeh para nonkiyejyekoskeh Iespíritu n Toteko Dios? Kaltempa kalaktiwitseh akimeh okitookatoh motlakau, iwa axa te noiwa mitstookatiweh.

¹⁰Ijkuakó Safira owetski ikxitla n Pedro iwa omikki. Ijkuak owalkalakeh n telpokameh, okajsikoh n Safira yomikki, okikixtijkeh iwa okitookatoh inakastla iokich.

¹¹Nochteh n tlaneltokakeh, iwa akimeh okimatkeh tlan otlamochi, satlawel omomojtijkeh.

¹²Itlatitlanilwah Jesús okinnextiayah miakeh neskayolteh iwa tlan tetlajtlachialti ompa Jerusalén, iwa nochteh non okineltokayah n Jesús omoololoayah kan korrédor non kiliah Portal de Salomón.

¹³Iwa n oksikimeh mach omixewiayah moneloskeh inwah, pero nochteh okintlanekiliayah.

¹⁴Iwa omomiakiliayah miakeh tlakah iwa siwameh non okineltokayah n Toteko.

¹⁵Iwa asta okinkixtiayah inkokoxwah itech ojtli, iwa okintlaliayah ipan inkuaujtlapech noso ipan impetl para ijkuak panos n Pedro, maya san ika itlasekawilo makoninmajsi iwa ijkó mapajtikah.

¹⁶Noiwa akimeh ochantitokah itech altepemeh non okiyawalojtokah Jerusalén, okwalinwikayah inkokoxwah iwa akimeh okimpiayah espíritus amokualteh, nochteh opajtiah.

¹⁷Ijkuakó n tiópixki non okachi otlayakantoka iwa sikimeh saduseos non iwa okatkah, satlawel oxikojmikeh,

¹⁸iwa okinkitskijkeh n tlatematiltijkeh iwa okintsakeh.

¹⁹Pero se yúali iángel n Toteko okitlapo n kaltentli kan otsaktokah, iwa okinkixtih. Iwa okinmili:

²⁰—Xiwiah kan Weyi Tiopa, iwa xikinmatiltikah n tlájtoli non kitemaka temakixtílistli.

²¹Okikakeh, iwa ijkuak owaltláneski oyajkeh kan Weyi Tiopa iwa opé tlamachtiah. Ijkuakó n tetajmeh non tlayakantokeh kan Weyi Tiopa iwa non íwa okatkah, okinnotskeh mamoololokah nochteh non otlanawatiayah kan Weyi Tiopa. Satepa otlatitlankeh makinnotsatih n tlatitlanilteh kan otsaktokah.

²²Pero ijkuak n tlamokuitlawijkeh okalakitoh kan otsaktokah n tlatematiltijkeh, ayakmó okinmajsitoh. Iwa owalmokoptiwetskeh otlanawatikoh n tlatematiltijkeh ayakmó ompa okatkah,

²³iwa okijtojkeh: —Otikkajsitoh n kaltentli kuali tsaktok, iwa n tlamokuitlawijkeh okiyekmokuitlawijtokah n kaltentli kan otsaktokah n tlatematiltijkeh, pero ijkuak otitlatlapojkeh, amaka otikajsikeh tlaijtik.

²⁴Ijkuak okikakeh nochi ni, n tlayákanki de non otlamokuitlawiayah kan Weyi Tiopa iwan tiopixkeh non otlayakantokah, omotlajtlachialtijkeh iwa omotlajtlaniayah tlan okachi tlamochiwaskia.

²⁵Ijkuakó okalakiko se tlakatl, iwa okinmili: —N tlakah akimeh nomejwah nonkintemoah kateh kan Weyi Tiopa, iwa kinmachtijtokeh n tlakah.

²⁶Ijkuakó n tlayákanki iwa itlamokuitlawilwah, oyajkeh okwalinnotsatoh n tlatematiltijkeh, iwa okwalinwikakeh ika kuali, porke omawiah makinmojmotlakah ika tetl.

²⁷Ijkuak okwalinwikakeh, okinketsatoh innawak tekiwajkeh, iwa n tiópixki non okachi otlayakantoka okinmili:

²⁸—Tejwah kuali otomechilijkeh ayakmó xitlamachtikah ika itoka non tlakatl. Pero nomejwah amo onontechtlakitakeh, yej itech nochi nin altepetl de Jerusalén yononkiteixmatiltijkeh itlamachtilis non tlakatl. Iwa axa nonkinekih techtlajtlakoltiskeh de imikilis non tlakatl.

²⁹Ijkuakó Pedro iwa n oksikimeh tlatematiltijkeh otlanankilijkeh: —Tejwah tikpiah tiktlakitaskeh tlan Dios kijtoa iwa amo tlan kijtoah n tlakah.

³⁰Idios totatawah okiyoliti n Jesús, Ye Akin nomejwah ononkimiktijkeh ijkuak ononkikrusifikarojkeh ipan krus.

³¹Dios yokiweyijkachi n Jesús ika iweletilis, iwa okitlali mayeto Tlayákanki iwa Totemakixti. Dios ijkó okichi para nochteh n tlakah de Israel mamoyolpatlakah inawak iwa makintlapojpolwili intlajtlakolwah.

³²Tejwah otiktakeh iwa otikkakeh tlan tomechtlapowiah sansikah iwa n Espíritu Santo non Dios kinmaka akimeh kitlakitah.

³³Ijkuak yejwah okikakeh tlan okijtoayah n tlatematiltijkeh, okualankamikeh iwa yokinekiah kinmiktiskeh.

³⁴Pero ompa inwah nonteh tekiwajkeh okatka se tlakatl fariseo non itoka Gamaliel. Ye okatka se tlamachti de itlanawatil Moisés iwa nochteh n tlakah satlawel okitlakitayah. Gamaliel omóketski iwa otlanawati makinkixtikah n tlatematiltijkeh san achitsi.