Acts 5:11-30

¹¹Bigeruwana biyisi ereonowasi Jerusalem kamonai, ba pipiya mutusi nikona si nonori wai nagara i bobunuisi.

¹²Ba apostle matakira ba kituruba pesarisi si wose pipiya kamosi yai, ba bigeruwana biyisi ereonowasi mamanina sibi kesanisi Solomon ana tupatainai wai namai kesanisi.

¹³Bagunai wata si kao bigegaenisi saba kega kesana kotoi i botubotu ku kamosi.

¹⁴Saba yebo pipiya pesarisi sebasebare ba baibaine Bada si geruwei wai asi koroto i rakata ba i pesara.

¹⁵Ba apostle asi saibira damona wai, pipiya gubagubagisi si kabarisi, si kasibau ku keta basusi, ba gawara si kepana ba si terisi kata, abisiri yai Peter ita nenae wai, kemeyauna wata pipiya mutusi ita sowoisi wai, sita yawasa.

¹⁶Kata pipiya pesarisi yebo meyaga mutusiyai Jerusalem parinai, gubagubagisi ba yebo iyabosi kanuma goyogoyosi, kamosi yai si mamana wai, ereonowasi si urabaisi si botu wai si yawasa.

¹⁷Damanina ba priest kaikapona ba turaturana, kosi iyabosi wai Sadducee biyisi nuwarauwa i bonuvisi.

¹⁸Ba apostle si patumisi ba ku patuma yovena si terisi.

¹⁹Saba kona pominai Bada ana aneya patuma yovena kana matam keta i botaveyei ba i urabaisi si kasibau.

²⁰Ba i wona, “Ko nae God ana yove garana kamonai ba pipiya ereonowasi niko yawasa wauna, warana tupana ko wonisi.”

²¹Damanina ba aneya i wonisi wai nanakasike si wosei. Mara tomtom ai si riu God ana ku yove garana kamona ba pipiya bibeyebeyisi si dagui. Ba maranai priest kaikapona kana bibaita yabata si verakasibau wai, Sanhedrin biyisi ereonowasi si yorisi si botu ba dugu kaikapona si yauni, ba wara si porai ku patuma yovena kata apostle sita urabisi sita botu.

²²Saba God ana yove aba potapotasi si verakasibau ku patuma yove wai kega namai si pananisi wai si veramaga ba si mamatara,

²³si wona, “Yakai patuma yovena wai gudu kikisina kapanani, saba aba potapota pipiyisi wai matam ketai si bimsiri. Saba maranai matam keta kabo tavetaveyana wai, kega kesana kotoi kamonai ka panani.”

²⁴Nikosi sisiya si nonori wai God ana yove aba potapotaisi asi bada kaikapona, ba priest kaikaiwabosi wai nuwasuya si kakabi, kata awaika i tupuwa.

²⁵Damanina ba pipiya kesana i botu ba i wona, “Koi tainabaenega, nokosi sebasebare ko patumisi wai karaku God ana yove garana kamonai pipiya te bibeyebeyisi.”

²⁶Ba God ana yove aba potapotasi asi bada kaikapona yabata si nae wai apostle, si urabaisi si botu. Kega si rubi yagiyaginisi, kairavina pipiya si nagarisi kata akimai si ta kayo ravisi.

²⁷Ba apostle si botuvisi wai Sanhedrin kurisi si terisi, kata God ana yove kana priest kaikapona iti kasekasemanisi.

²⁸Ba i wonisi, “Komi sisiya padapadana ka berimi, kata kega Iesu kana wabai koti beyebeyena, saba ko wose tupetupena kata ami bibeyebeyena Jerusalem i bonuvi, ba ko wosei wai niko sebare ana rabobo kunumakina kana kabari.”

²⁹Saba Peter ba apostle mutusi si kaobeyisi si wona, “Yakai God kana bosisirei ba kega pipiya!

³⁰Ba tutunuta asi God, Iesu rabobo ai ibo bimsiriyei, ba niko Iesu korosi yai ko tuparatui.