Acts 15:23-40

²³Ma wei pepana au urai i terei, Aposol, ekalesia babadai, varevareimi. Jentail ekalesia au Antiok, Syria provins ma Silisia provins. Varevareiai, egualau!

²⁴Tauai riwana a vaia da rava ḡelaui ai au boru i ḡairai ma ai viararamani i vinuabolaimi ma i visina-viraviraimi, wate tauai nai ravai eḡa ata paritawanei.

²⁵Lamna aubaina tauai a viboru ma a vianina da taupariverena ata paritawaneiai, ata rava Paul ma Barnabas maiteni,

²⁶taui i verena-melei ma ai lawana eḡa ita vinuabolei Bada Iesu Keriso wavana aubaina.

²⁷Judas ma Sailas a pariparitawanei da taui gamoiei ina riwemi aiwai tauai a girumi.

²⁸Arua Vivivireina ma tauai ai ḡoana da eḡa vita ḡaeḡaena ana veremi, anina wei tarawatuna ava.

²⁹Lam god morumorui i puloi eḡa ona ani, Eḡa tara ona umai, Eḡa ḡamoḡamo uana kikikina vioana ana tarana ona ani. Eḡa ona viawawana labalababa, Mepa da wei tarawatui ona vojijina-kauei, taumi kaua aiaina o kaukauei. Egualau kaua.

³⁰Ma nelarai i paritawanei da i ḡaira au Antiok, ma ekalesia i rieiai da pepa i verei.

³¹Ma taui i ʼavi ma i vinuaiai kaua pariverena aiaina aubaina.

³²Judas ma Sailas taui God ana peroveta ma i babani guratana awarii ma wei taui i vinuaiaiei ma ai tumaḡana i vovai-virewapani.

³³Ma kampa i mae mara aburuna ma ekalesia ana nuaubai i paritawana-melei au Jerusalem.

³⁵Wate Paul ma Barnabas au Antiok i mae, ma taui maiteni Bada Riwana Aiaina i viararamani ma i raugugulei.

³⁶Ma muriai Paul, Barnabas i riwei, “Tana nae dobu au anatapuna mepa Bada Riwana Aiaina ta raugugulei ma ekalesia tana raugenari, ma tana inanai taui anina bo eḡa.”

³⁷Barnabas i ḡoei da John-Mark ita taravaini.

³⁸Wate Paul wei notana eḡa ita ḡoei aubaina au naona John taui au Pamphilia i ruba-tawanei ma eḡa ita mae da maiteni ita nola.

³⁹Ai viparipariniḡai i apoapoe guratana da taui i vilamonei. Barnabas, Mark i taravaini ma kukei i damana au au Saipras.

⁴⁰Paul, Sailas i vinei. Ma ekalesia, Bada i vibaḡai da ana aguei taui ai au nola ina paini.