Acts 10:9-22

⁹Maratomna au benai nanare maranai nelarai Joppa i tuḡereḡerei, Peter i ḡeta numa au tepana da ita raupari.

¹⁰Ma am i ʼraḡe ma i ḡoei da aiwai ita ani, maranai taui lam i vovokaukauei, ma Peter matanei rauboni i ʼnanai.

¹¹I ʼnanai mara i wanatawanei ma purapura inanana me puru ḡaeḡaena au adana 4 i vojijini ma marei i tere-ḡaireiai au dobu.

¹²Au orana lamna sia tapuna ma tapuna, tetetei me mota ma kiu au aidamo lavelavei.

¹³Ma pona i riwa, “Peter ma vomairi, ma viraḡena ma ma am!”

¹⁴Wate Peter i paribelei, “Eḡa! Lamna eḡa melanai ana kauei. Eḡa melanai lam viviḡana ata am-dadani.”

¹⁵Wate pona i babani me, “Aiwai God i viviaiainia, eḡa ma riwa da i apoapoe.”

¹⁶Mara tonuḡa wenanare i tupua ma me marana puruna i ḡaiana-melei au mara.

¹⁷Ma Peter aiwai i ʼnainanai anona i vinua-notenotei, nanare ma Cornelius nelara i paripari-tawanei, taui Simon ana numa i nelaḡai ma i ḡeta ana au metaeta.

¹⁸Taui i paridadana, “Weka rava wavana Simon-Peter e mamae bo eḡa?”

¹⁹Peter amapo da wei i vivinua-notenotei maranai Arua vivivireina i riwa, “Simon, nelara tonuḡa e baibaiem!

²⁰Lamna aubaina ma vomairi ma ma ḡaira au gabaura, eḡa ma geduai, aubaina tau a paritawanei awarim.”

²¹Peter i ḡaira ma awarii i riwa, “Taumi tau o baibaieu bo, Ami ḡoana aiwai?”

²²Ma nelarai i paribelei, “Tauai Cornelius mai Rome ai sorodia ai bada i paritawanelai, tauna rava jijimanina ma God tauvoepaepana, ma mai Jew maḡamaḡaui tauna e vivivirei. Anela vivivireina i riwei da uta nei ana au numa da aiwai u araramanei uta riwei.”