Yesu Tɔ̃rɛ̀ 10:9-22

⁹Kɛ̀ dɛ̀ɛ wentɛ́ kɛ̀ bɛ̀ nkérí kɛ tɔ́ɔ́nnɛ̀nko Sopee, kɛ̀ Piɛri dèkɛ kudɑ̀nkù kɛ bo dɔu nKuyie kɛ̀ diyiè còḿmú yɛyɔ.

¹⁰Kɛ̀ dikònnìi ò pĩ nkɛ̀ bɛ̀ nhò bèrí mudiì, kɛ̀ Kuyie nhò bɛnkɛ dɛ̀mɑrɛ̀.

¹¹Kòo yɑ̀ tiwɛtì kpetɛ́mɛ̀ kɛ̀ dɛ̀mɑrɛ̀ cutiní kɛĩ́nkɛ̀ kɛ dònnɛ̀ kuyɑ̀ɑ̀kù, kɛ píítí dɛ píìtì tìnɑ̀ɑ̀ kɛ tɔ́ɔntɛnì kɛtenkɛ̀.

¹²Kɛ̀ iwũɔ̃ imɔu botí bo dɛ miɛkɛ: Itɑ̀ɑ̀kɛ ìnɑ̀ɑ̀ kpɛyi nɛ̀ iwɑ̀ɑ̀kɛ nɛ̀ tinɔ̀tì tibotí tibotí.

¹³Kòo keè mɛtɑmmɛ̀ mɑmɛ̀ kɛ̀ mɛ̀ tu: Piɛri ítɛ́ kɛ́kuɔ kɛ́cɑ́ɑ́kɛ́.

¹⁴Kɛ̀ Piɛrii yetɛ kɛ dɔ̀: Áɑ̀ n Yiɛ̀! N yí di diyiè mɑrì ikuɔ́ yetɛ dɛ̀ nɛ̀ dɛ̀ɛ̀ í wenni.

¹⁵Kɛ̀ mɛtɑmmɛ̀ɛ yíɛ́ kɛ dɔ̀: Bɑ́ nwúó nKuyie nyĩ dɛ̀ɛ̀ wenni kɛ tú dɛ̀ sĩ̀.

¹⁶Kɛ̀ dɛ̀ mmɛ nhɔ̃ kɛ dɔ̀ kucɛ mɛ̀tɑ̃ɑ̃ti kɛ́wɛ̃too kɛĩ́nkɛ̀.

¹⁷Kɛ̀ Piɛri ntoti o yɛ̀mmɛ̀ kɛ bo yɑ̀ Kuyie ndɔ́ kóò nɑ̀kɛ́ tì kɛ dɛ̀ nhò bɛnkɛ, kɛ̀ Kɔrinɛi tɔ̃nní bɛ̀ tùɔ̀kɛní kɛ cómmú dibòrì,

¹⁸kɛ́bekɛ kɛ dɔ̀: Diɛ ndɛ Simɔɔ bɛ̀ tú wè Piɛri ò bomɑ̀ɑ̀?

¹⁹Kɛ̀ Piɛri bɑɑ nkpɑɑ́ toti o yɛ̀mmɛ̀ kɛ̀ Muyɑɑ́nsɑ̀ɑ̀mùu ò nɑ̀kɛ́ kɛ dɔ̀: Bɛnìtìbɛ̀ bɛtɑ̃ɑ̃ti biɛ nkɔ̀tɛní ɑ borɛ̀ ndɛ.

²⁰Cútóo kɛ́ bɛ̀ nɛinɛ̀, kɛ bɑ́ nyĩɛ̃̀kù, míì bɛ̀ tɔ̃nní.

²¹Kɛ̀ Piɛrii cútóo kɛ́ bɛ̀ nɑ̀kɛ́ kɛ dɔ̀: Míì tú onìtì di wɑɑ̀ nwè, di yɛ̃ mbɑ?

²²Kɛ̀ bɛ̀ dɔ̀: Ohɑ̃ɑ̃pɔ̀nkótì Kɔrinɛi wèè dɔ̀ɔ̀ri Kuyie ndɔ́ dɛ̀, kɛ kù dé, kɛ̀ Sifubɛ bɛmɔu ò dɔ́, Kuyie ntɔ̃nnì we nnɑ̀kɛ́ kòò ti tɔ̃nní kɛ tú ɑ kɔtoo kóò nɑ̀kɛ́ ɑ mɔkɛ tì.