6Upi ra taun tarai namur na nunure diat, maia, a umana bul ba da kava boko diat; Diat a tut, ma diat a ve ra umana natu i diat;
7Upi diat a nurnur tai God, Ma koko diat a valubane ra lavur papalum God i ga pait ia, Ba diat a torom uka ta kana lavur vartuluai;
8Ma koko diat a mur ra umana tama i diat, Tago a umana karduk diat ma ra umana tena varpiam, A taun tarai ba pa dia mal vadovot ra nuknuk i diat, Ma ra tulungea i diat pa i tur padikat pire God.
9A umana natu i Epraim ba dia kap vargal ma dia vatur ra panak, Dia ga takap uka ta ra bung na vinarubu.
10Pa dia torom ta ra kunubu kai God, Ma pa dia mur kana vartovo.
11Ma dia valubane ra lavur magit i ga pait ia, Ma kana lavur papalum ba i ga ve tar ia ta diat.
12I ga pait ra umana magit na kinaian ta ra luaina mata i ra umana tama i diat, Ta ra gunan Aigipto ma ta ra langun Soan.
13I ga pelegi ra ta, ma i ga tul tar diat upi diat a tinur bolo tana; I ga varurue ra polo upi na tur guvai.
14Ta ra keake i ga rap lue diat ina ra bakut, Ma ta ra marum par ma ra biro na iap.
15I ga pelegi ra umana vat ki ta ra pupui, Ma i ga manga vamomo diat ma ra tava mara ra bala na pia.
16I ga tul tar ra tava ba na nanoro rikai ta ra vat, Ma i ga vananoro ra polo da ra tava alir.
17Ma pa dia ga ngo ma ra varpiam tadav ia, Dia ga tut na varpiam ika ure ra Ngala Kakit ta ra pupui.
18Ma ta ra bala i diat dia ga valar God Ma ra nilul upi ra nian varogop ma kadia mamainga.
19Maia pa, dia ga takun God; Dia ga biti: God na vaninare vang ra nian ta ra pupui?
20Ea, i ga kita ra vat ki ma ra tava i ga nanoro rikai tana, Ma i ga manga lovon. Dave, na tale pi na tul tar ra gem bula? Na tabar kana tarai ma ra kirip vang?
21Kari, ba ra Luluai i ga valongore, i ga ngangal na kulot; Ma di ga vabirao ra iap ure Iakob, Ma ra kankan i ga tubang rikai ure Israel;
22Tago pa dia ga kapupi God, Ma pa dia ga nurnur ta kana valavalaun.
23Ma i ga vartuluai pire ra maup, Ma i ga papa are ra umana matakilalat i ra bakut,
24Ma i ga tul tar ra bata na mana, Ma i ga tabar diat ma ra kon marama ra bala na bakut.
25A tarai par dia ga en ra gem kai ra umana angelo, I ga tulue ra peal magit.
26I ga vatut ra taur ta ra lao; Ma i ga rap ra taubar ma ra dekdekina;
27Ma i ga tul tar ra peal kirip da ra bata, Ma ra beo liuliu i peal da ra veo ra valian.
28Ma dia ga bura livuan ta ra gunan kai ra tarai, Ma kikil ra kubakuba i diat.
29Damana dia ga ian ma dia ga maur, Ma i ga tul tar ra magit ta diat dia ga kaina upi ia.
30Pa dia ga tabar vango boko kadia mamainga, Ma pa dia ga konome ra adia magit boko,
31Ba ra kankan kai God i ga tut rikai ure diat, Ma i ga ubu doko diat dia dekdek pire diat, Ma i ga vamutue ra umana barmana Israel.
32la kaka, pa dia ga ngo kan ra varpiam, Ma pa dia ga kapupi kana lavur enana papalum.
33Ma i ga vapar vue kadia kini ati ra pia da ra magit vakuku, Ma kadia lavur kilala dia ga panie ta ra ngala na nidadar i vut vakaian.
34Ba i ga ubu diat, dia ga titir upi ia; Ma dia ga vana tapuku, ma dia ga ongor mulai ma ra tinikan upi God.
35Ma dia ga nuk pa mule ba God kadia vat ki, Ma ra Ngala Kakit kadia tena valaun.
36Ma dia ga manane vavaongo pa ia ma ra ngie i diat, Ma dia ga tuam pa ia ma ra karamea i diat.
37Tago ra bala i diat pa i ga dovot pirana, Ma pa dia ga tur padikat ta kana kunubu.
38Ma God i ga pun vue ra varpiam, Ma pa i ga varli, tago a tena varmari tuna, Ma mangoro na bung i ga tigal bat kana kankan, Ma pa i ga vararak kana kulot par.
39Ma i ga nuk pa ia ba diat a tarai ka; Dia da ra vuvu, ba i panie ma pa i vana rikai mulai.
40Mangoro na bung dia ga tut na varpiam ta ra pupui, Ma dia ga vatakunuan ia ta ra bil!
41Ma dia ga lilikun mulai, ma dia ga valar God, Ma dia ga vakankan ra Lia Kakit kai Israel.
42Vakir dia ga nuk pa ra limana, Ba ra bung i valaun diat kan kadia lavur ebar tana.
43Pa dia ga nuk pa ra lavur mangana vakilang i ga pait ia aro Aigipto, Ma kana lavur papalum na kinaian ta ra langun Soan.
44I ga pukue kadia lavur tava alir upi ra polo na gap uka, Ma kadia lavur tava ki bula, ma pa dia ga pait valar pa ra nimomo.
45I ga tulue ra umana livur na langa na pap tadav diat, ma dia ga karat diat; Ma ra lavur rokrok bula, nina dia ga vakaina diat.
46I ga tul tar ra vuai kadia uma ta ra lavur po na vui, Ma ra vuai kadia papalum ta ra lavur kubau.
47I ga vakaina vue kadia davai na vain ma ra bata na vatvat, Ma kadia umana lovo ma ra kaina mavoko.
48I ga tul tar ia ba ra bata na vatvat na tup kadia umana vavaguai, Ma ra malamalapang i ga tup kadia lavur bulumakau.
49I ga lingire taun diat ma kana karangap na kankan, A kulot, ma ra karvuvu, ma ra purpuruan, I ga tulue ra umana tultul dia vakavakaina.
50I ga mal ra nga ure kana kulot, Pa i ga mari kadia nilaun upi koko diat a mat, I ga tul tar ia ba na tup diat ra kaina minait;
51Ma i ga ubu doko ra lavur luaina bul par ta ra gunan Aigipto, A luaina vuai ra dekdek i diat ta ra pal na mal kai Kam.
52Ma i ga agure vairop kana tarai iat da ra kikil na sip, Ma i ga rap lue diat ta ra pupui da ra kikil na vavaguai.
53Ma i ga agure bulu pa diat, ma damana pa dia ga burut; Ma ra ta i ga vue taun uka kadia lavur ebar.
54Ma i ga agur pa diat ta kana langun gomgom, Ma ta ra gunan i lualuana nina ba i ga kul pa ia ma ra limana tuna.
55Ma i ga korot vue ra umana Tematana ta ra luaina mata i diat, Ma i ga tibe tar ra gunan ta diat, upi diat a kale pa ia. Ma i ga vaki ra umana vuna tarai Israel ta kadia umana pal na mal.
56Ma dia ga valar ika God, a Ngala Kakit, ma dia ga tut na varpiam uka ure, Ma pa dia ga torom ta kana umana vartuluai;
57Dia ga vana tapuku ka, ma dia ga vavagu da ra umana tama i diat, Dia ga vana rara da ra pu i pak.
58Tago dia ga vakankan ia ma kadia umana tavul a lotu, Ma dia ga vangangal ia ma kadia lavur tabataba.
59Ba God i ga valongore, i ga kankan, Ma i ga okole vakakit vue Israel;
60Kari i ga vana kan ra kubana aro Silo, Ra pal na mal nina i ga vatur ia pire ra tarai.
61Ma i ga tul tar ra dekdekina ba na ki ta ra gunan na vaira, Ma kana minamar upi ra ebar na vatur vake.
62I ga nur tar kana tarai bula ta ra vinirua; Ma i ga kankanuane kana tiniba.
63A iap i ga vaimur kadia umana barmana, Ma kadia umana inip na vavina pa dia ga gugu ta ra malagene na varbean.
64Kadia umana tena tinabar dia ga virua ta ra pakat na vinarubu, Ma kadia umana ua na vavina pa dia ga tangie diat.
65Io, ra Luluai i ga tavangun, da ta tikai i tavangun kan ra nidiop, I ga tavangun da ra.tena niongor ba i ga tar mome ra polo na vain.
66I ga ubu vatalil kana umana ebar, I ga varuva vatikene pa diat.
67Tikai bula, i ga pilak vue ra kuba i Iosep, Ma pa i ga vilie ra vuna tarai Epraim;
68Ma i ga pilak pa ra vuna tarai Iuda ka, A luana Sion, nina ba i manane.