A Umana Kakailai 78:13-58

¹³I ga pelegi ra ta, ma i ga tul tar diat upi diat a tinur bolo tana; I ga varurue ra polo upi na tur guvai.

¹⁴Ta ra keake i ga rap lue diat ina ra bakut, Ma ta ra marum par ma ra biro na iap.

¹⁵I ga pelegi ra umana vat ki ta ra pupui, Ma i ga manga vamomo diat ma ra tava mara ra bala na pia.

¹⁶I ga tul tar ra tava ba na nanoro rikai ta ra vat, Ma i ga vananoro ra polo da ra tava alir.

¹⁷Ma pa dia ga ngo ma ra varpiam tadav ia, Dia ga tut na varpiam ika ure ra Ngala Kakit ta ra pupui.

¹⁸Ma ta ra bala i diat dia ga valar God Ma ra nilul upi ra nian varogop ma kadia mamainga.

¹⁹Maia pa, dia ga takun God; Dia ga biti: God na vaninare vang ra nian ta ra pupui?

²⁰Ea, i ga kita ra vat ki ma ra tava i ga nanoro rikai tana, Ma i ga manga lovon. Dave, na tale pi na tul tar ra gem bula? Na tabar kana tarai ma ra kirip vang?

²¹Kari, ba ra Luluai i ga valongore, i ga ngangal na kulot; Ma di ga vabirao ra iap ure Iakob, Ma ra kankan i ga tubang rikai ure Israel;

²²Tago pa dia ga kapupi God, Ma pa dia ga nurnur ta kana valavalaun.

²³Ma i ga vartuluai pire ra maup, Ma i ga papa are ra umana matakilalat i ra bakut,

²⁴Ma i ga tul tar ra bata na mana, Ma i ga tabar diat ma ra kon marama ra bala na bakut.

²⁵A tarai par dia ga en ra gem kai ra umana angelo, I ga tulue ra peal magit.

²⁶I ga vatut ra taur ta ra lao; Ma i ga rap ra taubar ma ra dekdekina;

²⁷Ma i ga tul tar ra peal kirip da ra bata, Ma ra beo liuliu i peal da ra veo ra valian.

²⁸Ma dia ga bura livuan ta ra gunan kai ra tarai, Ma kikil ra kubakuba i diat.

²⁹Damana dia ga ian ma dia ga maur, Ma i ga tul tar ra magit ta diat dia ga kaina upi ia.

³⁰Pa dia ga tabar vango boko kadia mamainga, Ma pa dia ga konome ra adia magit boko,

³¹Ba ra kankan kai God i ga tut rikai ure diat, Ma i ga ubu doko diat dia dekdek pire diat, Ma i ga vamutue ra umana barmana Israel.

³²la kaka, pa dia ga ngo kan ra varpiam, Ma pa dia ga kapupi kana lavur enana papalum.

³³Ma i ga vapar vue kadia kini ati ra pia da ra magit vakuku, Ma kadia lavur kilala dia ga panie ta ra ngala na nidadar i vut vakaian.

³⁴Ba i ga ubu diat, dia ga titir upi ia; Ma dia ga vana tapuku, ma dia ga ongor mulai ma ra tinikan upi God.

³⁵Ma dia ga nuk pa mule ba God kadia vat ki, Ma ra Ngala Kakit kadia tena valaun.

³⁶Ma dia ga manane vavaongo pa ia ma ra ngie i diat, Ma dia ga tuam pa ia ma ra karamea i diat.

³⁷Tago ra bala i diat pa i ga dovot pirana, Ma pa dia ga tur padikat ta kana kunubu.

³⁸Ma God i ga pun vue ra varpiam, Ma pa i ga varli, tago a tena varmari tuna, Ma mangoro na bung i ga tigal bat kana kankan, Ma pa i ga vararak kana kulot par.

³⁹Ma i ga nuk pa ia ba diat a tarai ka; Dia da ra vuvu, ba i panie ma pa i vana rikai mulai.

⁴⁰Mangoro na bung dia ga tut na varpiam ta ra pupui, Ma dia ga vatakunuan ia ta ra bil!

⁴¹Ma dia ga lilikun mulai, ma dia ga valar God, Ma dia ga vakankan ra Lia Kakit kai Israel.

⁴²Vakir dia ga nuk pa ra limana, Ba ra bung i valaun diat kan kadia lavur ebar tana.

⁴³Pa dia ga nuk pa ra lavur mangana vakilang i ga pait ia aro Aigipto, Ma kana lavur papalum na kinaian ta ra langun Soan.

⁴⁴I ga pukue kadia lavur tava alir upi ra polo na gap uka, Ma kadia lavur tava ki bula, ma pa dia ga pait valar pa ra nimomo.

⁴⁵I ga tulue ra umana livur na langa na pap tadav diat, ma dia ga karat diat; Ma ra lavur rokrok bula, nina dia ga vakaina diat.

⁴⁶I ga tul tar ra vuai kadia uma ta ra lavur po na vui, Ma ra vuai kadia papalum ta ra lavur kubau.

⁴⁷I ga vakaina vue kadia davai na vain ma ra bata na vatvat, Ma kadia umana lovo ma ra kaina mavoko.

⁴⁸I ga tul tar ia ba ra bata na vatvat na tup kadia umana vavaguai, Ma ra malamalapang i ga tup kadia lavur bulumakau.

⁴⁹I ga lingire taun diat ma kana karangap na kankan, A kulot, ma ra karvuvu, ma ra purpuruan, I ga tulue ra umana tultul dia vakavakaina.

⁵⁰I ga mal ra nga ure kana kulot, Pa i ga mari kadia nilaun upi koko diat a mat, I ga tul tar ia ba na tup diat ra kaina minait;

⁵¹Ma i ga ubu doko ra lavur luaina bul par ta ra gunan Aigipto, A luaina vuai ra dekdek i diat ta ra pal na mal kai Kam.

⁵²Ma i ga agure vairop kana tarai iat da ra kikil na sip, Ma i ga rap lue diat ta ra pupui da ra kikil na vavaguai.

⁵³Ma i ga agure bulu pa diat, ma damana pa dia ga burut; Ma ra ta i ga vue taun uka kadia lavur ebar.

⁵⁴Ma i ga agur pa diat ta kana langun gomgom, Ma ta ra gunan i lualuana nina ba i ga kul pa ia ma ra limana tuna.

⁵⁵Ma i ga korot vue ra umana Tematana ta ra luaina mata i diat, Ma i ga tibe tar ra gunan ta diat, upi diat a kale pa ia. Ma i ga vaki ra umana vuna tarai Israel ta kadia umana pal na mal.

⁵⁶Ma dia ga valar ika God, a Ngala Kakit, ma dia ga tut na varpiam uka ure, Ma pa dia ga torom ta kana umana vartuluai;

⁵⁷Dia ga vana tapuku ka, ma dia ga vavagu da ra umana tama i diat, Dia ga vana rara da ra pu i pak.

⁵⁸Tago dia ga vakankan ia ma kadia umana tavul a lotu, Ma dia ga vangangal ia ma kadia lavur tabataba.