A Umana Kakailai 74:10-19

¹⁰God, aivia ra bung boko ra ebar na varkulumai? Dave, ra ebar na vul vatikene pa bar ra iangim?

¹¹Ta ra ava u tak vue ra limam kan avet, a limam tuna iat? Una tulue vaarike, ma una vamutue diat.

¹²Ma God kaugu King papa amana iat; I ongaongor ma ra valavalaun ta ra rakarakan a gunagunan.

¹³U ga tibe varbaiane ra ta ma ra dekdekim; U ga pamar gigi ra ulu i ra pukpuk ta ra tava.

¹⁴U ga pamar gigi ra ulu i ra konakonom, U ga tul tar ia pire ra tarai dia ki ra pupui, upi ra adia nian.

¹⁵U ga kita pelegi ra vat i ta upi ra lovon na alir tavit tana, U ga rang vamama ra umana tava alir, ma lua dia ga tavit vatikai.

¹⁶Kaum ra keake, ma kaum bula ra marum, U ga vaki ra kapa ma ra matana keake.

¹⁷U ga pait ra langlangun na rakarakan a gunagunan par, U ga pait ra e na taubar ma ra e na labur.

¹⁸Luluai, una nuk pa ia, tago ra ebar i tar varkulumai; Ma ra umana papaua dia tar vul ra iangim.

¹⁹Koko una tul tar kaum vakak na uka ta ra umana leing. Galiaka una valubane vatikene vue kaum malari na tarai.