A Umana Kakailai 73:9-23

⁹Dia tatike ra tinata da marama ra bala na bakut, Ma kadia pirpir i vana ta ra rakarakan a gunagunan.

¹⁰Kari kana tarai dia mur diat, Ma dia maur ma ra ngala na nimomo.

¹¹Ma dia biti: God na nunure davatane? Ma ra Ngala Kakit i matoto vang?

¹²Ea, dari ra mangamangana kai ra kaina tarai! Dia ki vovovon vatikai ati ra pia, ma dia tar lu varurue ra ngala na tabarikik.

¹³A dovot iau tar dalu ra balagu vakuku, I gomgom vakuku ra limagu;

¹⁴Tago di vakadik iau a bungbung par, Ma di tar virit iau ta ra malana a bungbung par.

¹⁵Gala iau ga biti: Ina tatike ra dari; Ea, ina gala vagu pa kaum taun tarai.

¹⁶Ma iau ga nununuk vanavana upi ina nunure go, Iau ga milamila tana;

¹⁷Tuk tar ta ra bung ba iau ga ruk ta ra pal i gomgom kai God, Ma iau ga nuk pa ra mutuai diat tuna.

¹⁸A dovot u vatur diat ta ra pakana gunan i duladula, U rapue vakaian diat, ma dia virua.

¹⁹Dia tar virua lulut! I tar par, dia tar imur kakit ma ra ngala na bunurut.

²⁰Da tikai i pidimuane ra ririvon ba i tavangun, Damana Luluai, ba u tavangun una pidimuane ra malalar i diat.

²¹Ba i mapak ra nuknukigu, Ma ba i pinpidian ra balagu,

²²Iau ga koloata ma iau ga tabobo, Iau ga da ra kaina leing ika piram.

²³Ma go iau ki vatikai ka piram; U tar vatur vake ra limagu tuna.