A Umana Kakailai 50:3-19

³Kada God na vut ma pa na ki mut! A iap i ulur na lua tana, Ma i tup ia ra vuvu kikil ia;

⁴Na oro upi ra bala na bakut arama, Ma upi ra rakarakan a gunagunan upi na kure ra taraina;

⁵Avat a agure pa kaugu lavur tena lotu tadav iau, Diat ba ave ga pait ra kunubu ma ra tinabar.

⁶Ma ra bala na bakut na varvai ta kana mangamangana takodo; Tago God iat i tena varkurai. Sela.

⁷Kaugu tarai, avat a valongore, ma ina tata; U Israel, ina pit u; Iau God, maia, kaum God.

⁸Pa ina pit u ure kaum lavur tinabar; Ma kaum lavur tinabar di tun tar ia dia tur vatikai ta ra luaina matagu.

⁹Pa iau mainge ta tikai ta kaum lavur bulumakau, Ma pa iau mainge bula ra me ta kaum kikil na me.

¹⁰Tago ra lavur leing ta ra pupui kaugu diat, Ma ra lavur vavaguai ta ra arip na marmar na lualuana bula.

¹¹Iau matoto ta ra lavur beo ta ra lualuana, Ma ra lavur kuabar ta ra lokalokor kaugu diat.

¹²Gala ina mulmulum, gala pa ina ve u, Tago ra rakarakan a gunagunan kaugu, ma ra lavur magit i kor tana kaugu bula.

¹³Dave, ina en ra kanomong i ra bulumakau bar? Ba kan ina (mome ra gapu i ra me?

¹⁴Una tul tar ra tinabar na pite varpa tai God; Ma una pait ot pa kaum lavur vavalima pire ra Ngala Kakit;

¹⁵Ma una kail iau ta ra bung ba u ki na malari tana; Ina valaun u, ma una pite pa iau.

¹⁶Ma tadav ra tena varpiam God i biti dari: U varvai dave ta kaugu lavur togotogo, Ma dave u vatavatang kaugu kunubu?

¹⁷Tago u milmilikuane ra varpit, Ma u piam vue kaugu tinata.

¹⁸Ba u gire ta tena nilong amur gugu varurung me, Ma ava varirivut ma ra umana tena nipo.

¹⁹U tak ra ngiem upi ra kaina tinata, Ma ra karameam i vavagu.