A Umana Kakailai 35:2-21

²Una tak pa ra ramravit ma ra bakbakit, Ma una tut upi una maravut iau.

³Una ele pa ra rumu, ma una pore bat ra nga ure diat dia korot mur iau, Una biti ta ra tulungeagu dari: Iau kaum valavalaun.

⁴Boina ba diat dia mainge ba diat a doko iau, diat a vavirvir ma diat a ruva, Da pukue vatalil diat ma da vapurpuruan diat, ba dia abe pa ra kaina ure iau.

⁵Boina ba ra vuvu na kap vue diat da ra mapmapina; Ra angelo kai ra Luluai na rapu diat.

⁶Boina ba kadia nga na bobotoi ma na duladula par; Ra angelo kai ra Luluai na korot mur pa diat,

⁷Tago dia ga kapi kun ivai ure iau, ma pa ta vuna; Dia ga kal vakuku ra tung ure iau.

⁸Boina ba ra vinirua na tadav vakaian diat; Ma diat a taviviai ta kadia kun iat, nina dia kapi ive; Diat a bura tana, ma diat a virua.

⁹Ma ra tulungeagu na gugu tai ra Luluai, Na manga ga ta kana valavalaun.

¹⁰A urugu par na biti: Luluai, amur varogop ma to ia? U ba u valangalanga nina i ki na malari kan ra tutana i lia ta dir ma ra niongor; Maia, ma u valangalanga nam i malari ma i luveana kan ra tena nilong.

¹¹A umana tena varvai vavaongo dia tut; Dia tir iau ta ra lavur magit ba pa iau nunure.

¹²Dia bali ra boina ma ra kaina piragu, A tulungeagu i lingligur tana.

¹³Ma iau, iau ga mal ma ra mal na tabun, ba dia mait; I tup iau ra vinevel; Kaugu niaring i ga lilikun piragu.

¹⁴Kaugu mangamangana tadav ia i ga da ra mangamangana tadav talaigu ba turagu; Iau ga ula takodo ma ra tinabun da tikai i tangie nana.

¹⁵Ma ba iau vana lebalebe dia manga gugu ka, ma dia vana varurung, Dia vana varurung. ma dia tibul vakaian iau, Dia kadakadal iau, ma pa dia ngo.

¹⁶Da ra umana bilak na tena varkulumai vakuku, Dia vangvangia ra pal a ngie i diat tadav iau.

¹⁷Luluai, aivia ra bung boko una kiki ka? Una valaun ra tulungeagu kan kadia lavur varli, Ma kaugu kopono ko kan ra umana leon.

¹⁸Ina pite pa u ta ra ngala na kor na tarai; Ina pite pa u livuan ta ra pepeal tarai.

¹⁹Koko kaugu umana ebar vakuku diat a gugu ma iau, Ma koko diat dia milikuane vakuku iau diat a pitu mata.

²⁰Tago vakir dia tata ma ra malmal, Dia abe pa ka ra vaongo ure diat dia ki bulu ta ra gunan.

²¹Maia, a ngie i diat i manga panganga tadav iau, Ma dia biti: Ioi, ioi, ave tar gire ma ra mata i vevet.