A Umana Kakailai 18:12-39

¹²A bata na vatvat ma ra lakit I irop kan ra talapar ta ra luaina matana. Ma i bura doladolo kana lavur ivarat;

¹³Ra Luluai i ga pangpagur bula arama ra bala na bakut, Ma ra Ngala Kakit i tata; A bata na vatvat ma ra lakit.

¹⁴I ga tulue kana umana pu, ma i korot varbaiane diat; Maia pa, mangoro na meme, ma i ubu vapurpuruan pa diat.

¹⁵A bala na ta i vana rikai Ta kaum varpit ma ta ra vuvu na bilaum; Dir ga vaarike bula ra vunapai ra rakarakan a gunagunan.

¹⁶I tulue ra limana marama, ma i vatur iau; I al vairop iau kan ra do na tava.

¹⁷I valangalanga iau kan kaugu dekdek na ebar, Ma kan diat dia milmilikuane iau, Tago dia ga manga dekdek ta vevet.

¹⁸Dia ga tadav iau ta ra bung iau ki na malari tana, Ma ra Luluai i ga tukal iau.

¹⁹I ben pa iau ta ra pakana gunan i maup; I valangalanga iau, tago i manga gugu tagu.

²⁰Ra Luluai i vapuak iau da i topa kaugu mangamangana takodo; I babali piragu da i topa ra gomgom na limagu.

²¹Tago iau tar mur ra nga kai ra Luluai, Ma pa iau vana rara kan kaugu God.

²²Tago kana lavur varkurai dia ga tur ta ra luaina matagu, Ma pa iau ga vue kana lavur togotogo kan iau.

²³Iau ga ko vurakit bula pirana, Ma iau ga balaure bat iau kan ra varpiam.

²⁴Kari ra Luluai i tar vapuak iau varogop ma kaugu mangamangana takodo, Varogop ma ra gomgom na limagu ta ra luaina matana.

²⁵Una ga vaarike kaum varmari pire diat dia varmari, Una ga ko vurakit tadav diat dia ko vurakit;

²⁶Una ga gomgom vurakit pire diat dia gomgom, Ma una ga turtur bat diat dia bilak.

²⁷Tago una ga valaun ra tarai dia malari; Ma diat dia malamala ngala ka, una ga vaikilik pa diat.

²⁸Tago una ga valiting kaugu lamp; Ra. Luluai kaugu God na vakapa kaugu bobotoi.

²⁹Tago ba dor ma u, ina korot mur a loko na tarai na vinarubu, Ma ona amir ma kaugu God ina pil lake ra liplip.

³⁰Ma ure God, kana nga i ko vurakit; A tinata kai ra Luluai i dovot; Ra Luluai a ramravit kadiat par dia nurnur tana.

³¹Tago ia God? la kaka ra Luluai. Ma to ia ra vat i ta? Kada God kakika.

³²Nam ra God i vi pit iau ma ra dekdek, Ma i mal kaugu nga upi na ko vurakit.

³³I mal ra kaugu upi na varogop ma ra kau i ra me, Ma i vaki iau ta kaugu kiki liu.

³⁴I tovo ra limagu ure ra vinarubu, Upi ra limagu na lele valar pa ra panak na palariam gobol.

³⁵U tar tul tar tagu bula ra ramravit nina ba kaum valavalaun; Ma ra limam tuna i maravut iau, Ma kaum varmari i pait vangala pa iau.

³⁶U tar valangalanga ra pakana gunan iau vanavana tana, Ma ra ura kaugu pa dir tamagaga.

³⁷Ina korot mur kaugu umana ebar, ma ina tadav diat; Ma pa ina lilikun mulai tuk ta nam ba dia tar virua.

³⁸Ina go vakakit diat upi koko diat a tut mulai. Diat a bura ta ra vavai ra ura kaugu.

³⁹Tago u tar vi pit iau ma ra dekdek upi ra vinarubu; U tar vamolo tar diat i tagu, diat dia ga tut na vinarubu ure iau.