A Umana Kakailai 17:1-11

¹A niaring kai David. Luluai, una valongore nam i takodo, una torom ta kaugu kinail; Una valongore kaugu niaring, nina ba pa i irop ta ra ngiegu ma ra vaongo.

²Boina ba ra varkurai ure iau na vana rikai tam; A matam na gire ra mangamangana takodo.

³U tar valar ra balagu; u tar tadav iau ta ra marum; U tar valar iau, ma pa u gire tadav ta magit; I ot ra nuknukigu ba koko na rara ra ngiegu.

⁴Ma ure ra mangamangana kai ra tarai: Iau tar nuk pa ra tinata na ngiem, ma pa iau mur ra lavur nga kai ra umana tena vakavakaina.

⁵Iau vanavana vatikai ta kaum lavur nga, A ura kaugu pa dir tamagaga.

⁶Iau tar kakail piram, tago u God, una ga valongore iau. Una lingan upi iau, ma una valongore kaugu tinata.

⁷Una vaarike kaum enana varmari, U nam, u valaun diat dia nurnur tam ma ra limam tuna Kan diat dia tut na vinarubu ure diat.

⁸Una balaure iau, da di balaure ra kiau na mata, Una ive iau ta ra malur na bebeam,

⁹Kan ra umana tena varpiam dia vakaina iau, Kan diat bula kaugu umana ebar tuna dia tur kikil iau.

¹⁰Dia tar banu bat ra bala i diat, Dia vatavatang ra lavur ngala na tinata vakuku.

¹¹Dia tur kikil avet go ta kaveve lavur vinavana, Dia makmakila upi diat a vabura avet ra pia.