1A kakailai na pite varpa; kai David. Ina tata vangala pa u, kaugu God, ra King; Ma ina pite pa ra iangim ma pa na mutu.
2Ta ra bungbung par ina pite pa u, Ma ina pite vatikene pa ra iangim.
3Ra Luluai i ngala, ma i kat tuna ba na ngala ra pite varpa pirana, Ma i dekdek upi da nunure ot pa kana ngala na kini.
4Tika na taun tarai na manane kaum lavur papalum ta ra mata i ta ra tikai, Ma na varvai ure ra lavur dekdek na magit u ga pait ia.
5Ina nununuk ure kaum potar na minamar ma kaum ngala na kini; Ma ure kaum lavur enana papalum.